CorseCurteJugn#13 – 70agns


#13 – 70 agns

Ven a stâi che i ai a pene finît setante agns.
E mi samee di jessi intun stret: di une bande îr, di chê altre vuê, e, plui lontan, e pûr dongje, doman.
E, intant, pensi al TIMP.
Timp une vôre lunc, se lu cjali indaûr: cetantis robis sucedudis, cetantis personis cognossudis, cetant di dut!
Timp curt, se lu cjali cui voi dal doman.
Di sigûr, il doman nol é ancjemò culì, e pûr lu disegni cun pinsîrs e vois, seneôse di chei biei, al profum di vite.
Ce saio, jo, di trop timp che il destin mi lasse?
Sai, jo o sai che e je dome cuistion di TIMP.
Chel orloi che al cor al cor al cor e no si ferme mai.
Fin che e rive chê Siore vistude di neri, ancje se a mi mi plâs pensâle in blanc.
Ma jo no mi met in spiete.
Vuei vivilu chel TIMP che mi reste: chel che al involuce, al strice, al sglonfe, al strissine, al cjape pal grop dal cûr.
Chel che al cjamine sore scarpis di sperance: di viodi ancjemò cressi i nevôts o pûr tornâ a viodi florî lis orchideis salvadiis. Chês che mi veve dât mê mari, tant timp indaûr, par plantâlis.
Eco, il TIMP.
Viôt, sì, o viôt ce che al cumbine sore la mê piel.
Come un tratôr cence fantasie, al lasse cumieris ator par dut.
Sigûr, no mi plasin, ma la ruede de vite e dîs che soi vecje.
I ai TIMP in regâl: «E ditu nuie?» mi rispuint bessole.
La vecjaie e je un TIMP fûr scuare, ma maraveôs.
Ogni zornade e podarès jessi la ultime e ogni sere in plui, eco che pensi a la Siore in blanc e la ringraci di no jessi passade des mês bandis.
La vecjaie e je un moment fuart e biél, parcè che no si sa trop che e dure.
A dî dute la veretât, un tic mi da fastidi, soredut cuant che jo o lei intai voi dai zovins: “Eco une vecje”.
Lu sai, parcè che ancje jo o disevi la stesse robe dai vecjos di une volte.
Eco ca, il TIMP.
No podìn fâ altri che volêi ben, ancje se al dûl par dut.
A 70 agns, vuê,  jo fermi il TIMP par ringraciâ, no dome il Signôr, ma un tic ancje me, par vê simpri volût vivi in pâs, armonie, e cirint il biél in dut: ancje in te Siore in Blanc.

di ***
#1***

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît