Lusôr inte risultive

Un fantat al jes di cjase sul fâ dal amont, e jê une sere di Mai, di chês che si passe ben al viert. Al è ancjemò un biel lusôr e il fantat al pense a trops lûcs intal Friûl che a saressin biei par passâ la serade. Un moment si viôt inte place de pescjarie di Puart, chel dopo a si imagjine inte place San Jacum di Udin, dopo ancjemò al imagjine di jessi intal borc di Gurize, inte place di Palme, ta un borc de Cjargne o te rive di un flum de plane e di li al tache imagjinâ come al sarès ta chel moment ogni lûc tal Friûl che i ven intal cjâf. Da Cjaurlis a Triest, da Maran a Tarvis. Intant che si piert intai soi pinsîrs al rive li de poce di une risultive, al voleve viodi i colôrs dal amont rifletisi inte aghe, stâ cualchi moment par so cont a gjoldi di une sere di Vierte.
Dut di un trat si acuarç che nol è di bessôl, al è cualchidun daûr di lui, cui podial jessi? Nol rive a voltâsi.
«Ce fâstu chi?» e je la vôs di une zovine.
«Nuie, fasevi doi pas» i rispuint cence voltâsi.
«A mi somee tu spietedis cualchidun».
«Tu disis?»
«Sì, o soi sigure».
«Cemût fâstu a savêlu?»
«Tu mi someis une anime in pene».
Il fantat al tâs, dopo al dîs: «O spieti une…»
«Une?»
«Sì, une».
«E cui ise cheste che tu spietis?»
«No lu sai»
«E alore parcè le spietistu?»
«Parcè che o speri che e rivi».
« Si tu la pensis cussì, podarès jessi ancje jo chê che tu spietis».
«Cuissà…»
«No tu sâs nancje ce muse che o ai».
«Ma o ai cognossût la to vôs».
«E alore? Si o fos une agane?»
«Ce fasaressistu?»
«Ti tirarès dentri inte aghe fin tal font e cence molâti».
«No tu mi someis rabiade cun me».
«No soi rabiade ma al è miôr par te che tu tornis cjase prime dal scûr».
«Sì, cumò voi cjase, ma doman o torni».
«Vignarâstu chi ogni sere a spietâ une che nancje tu cognossis?»
«Vuê une o l’ai cjatade»
«Doman al podarès no jessi nissun».
«Alore continuarai a vignî fin che no cjati di gnûf cualchidun»
«No crôt che tu cjatarâs altris che passaran par chi dopo di me».
«Alore no spietarai nissun altri che te».
Dut al tâs par un moment, dome un colp di aiar al passe a movi la aghe te poce. Dopo, la vôs de zovine si sint plui dongje: «Vûstu viodimi?» e i dîs planc, dongje de orele. «Sì», i rispuint lui. «Alore siere i voi»..
Al sint dôs mans bagnadis, piçulis e delicadis che i taponin i voi come une cjarece. Lis mans si slontanin dai siei voi e lui si volte planc, alore al vierç i voi, ma nol viôt nissun. Il fantat si cjale un moment ator, dopo al fâs une ridade e, a vôs alte, al dîs: «Doman o torni!»
Content di chest prin incuintri al torne a cjase di bessôl.

di Luche Bagnarol
#1230