CorseCurteAvrîl#08 – Un svoletâ di alis

#08 – Un svoletâ di alis

Come ogni dì, Fidrì si sentà tun banc dal parc, simpri tal stes. I deve di mangjâ ai siei amîs colomps. Dulintor al jere un buligâ di alis e un bruntulâ di volatii che a rivavin dantsi dongje a siei pîts in spiete che al vierzès  il sacut e al tiràs par aiar une grampade di mangjative.

Fidrì al gjoldeve chel spetacul di vite che ogni dì lu involuçave. Ma chê buinore no jere come chês altris, a malincûr al decidè di tornâ a cjase. Un berdei di alis si alçarin cun lui e i lerin dâur, soredut chel colomp che i becuçave i grans des mans. Rivât a cjase si butà sore un vecjo divan, sperant  che une buine durmide lu varès metût a puest. Ma tal doman nol jessì: «vuê i miei colomps a scugnaran rangjâsi», al pensà tornant a durmicjâ; si insumià che i siei amîs lu ricevevin cun grande balfuerie. Ma il banc, e no dome chel dì, al restà vueit. I colomps si rinderin cirint bon stâ inaltrò.

La dotoresse  dal repart di gjeriatrie e disè: «Puar vecjo, a son dîs che si è blocât in chest jet e nissun al à domandât di lui. Cui sa di dulà che al ven. Lassìn in sfese il barcon, viodìn ce che al sucêt. Po stâi che l’aiar e il soreli lu judin a vierzi i voi». Jê e veve cjapât a cûr la situazion di chest scognossût. Lu vevin cjatât incussient tal banc dal parc, cuntune man plene di mangjim par uciei.

Di cualchi dì in ca e ae stesse ore al rivave un colomp che si moveve grugjulant su la plane dal barcon dal ospedâl, al cjalave dentri studiant il spazi, une dì cjatant il barcon viert e che nissun lu varès parât vie, cuntune mosse subitanie al cjapà il svol, lant a poiâsi sul jet dal anzian, al moveve lis alis come volint dâi solêf.

Chel bati des alis al parè che lu tiràs fûr di chel letarc dulà che al jere colât. Lis palpieris si moverin, cuntun sfuarç al cirì di vierzi i voi, nol podè, ma une des sôs mans si poià su chês alis che lu riclamavin ae vite.
E cussì Fidrì a planchin al de di ca, tornant tal so banc dal parc graciis al so amì colomp.

di Galliano di Buenos Aires (Sicheduncje)
#1239