CorseCurteAvrîl#5 – Bestiis a Palme

#5 – Bestiis a Palme

Son i ultins dîs di scuele e Zuan al à fat i compits di corse par lâ sui bastions, pôc fûr de Puarte Aquilee, là che il fossâl di Palme al cjape aghe di risultive e lis galariis bandonadis e i arbui a ospitin cetancj nemâi.
Al va alì ogni dì, cul binocul di so nono, a viodi se al è rivât alc di gnûf: une bolp, une poiane, un falcuç o un sparvâl.
Al è dut cjapât e ae fin e salte fûr une bolp, che subit e sparìs intune galarie.
Di bot une pidade i rive di daûr e une vôs che al ricognòs subit: “Simpri cul cjâf a uciei!”
Rosse di cjavei, pivicjis inte muse, voi vivarôs e un caratarat, Gjonde e jê la frute plui salvadie de scuele e simpri che lu stice.
Al bute il binocul e al tache a cori daûr: cheste volte al à di fâi capî che e à di finîle. Al rive a cjapâle, ma e je fuarte e svelte, lu bute par tiere e a tachin a ribaltâsi, fin che lui, cun cetante fature al rive a tignîle. In chel, une pavee colorade si poie intai siei cjavei.
Il frut al reste par un moment maraveât e Gjonde si inacuarç che le cjale inte une altre maniere: “Cumò ce ti cjapie?” i dîs intant che la pavee e svole vie.
“Ma, ce faseso?”
Cascut biont e ocjai, Marte e je le fruielibris de scuele e ancje une peteçone.
I doi a si slontanin di colp.
“E ven a cjapâmi a pidadis di scuindon!”
“Al è simpri cul cjâf a uciei!”
Si dan le colpe l’un cul altri. Dopo a tasin e Zuan al fâs a Marte: “E tu ce fasistu achì? No vevistu dit che tu lavis a Grau?”
“No tu âs volût vignî e o soi stade a cjase, e in biblioteche o ai cjatât chest libri achì!”
“Le solite fruielibris!” le stice chê altre.
“Di ce che al conte?” Zuan al capìs che no lu à puartât dibant.
“Di chest puest achì, savevistu che cheste aghe e ven jù dal Zardin Grant di Udin e a chi si zonte cuntune risultive?”
“Mi visi che, cuant che a vevin tacât a fâ sù Palme, il Zardin Grant al jere un lât plen di liendis”.
“Come chês su lis risultivis! Viodistu? Achì si incrosin lis liendis”.
I trê a si sentin suntune bancjute sot di un salgâr de madone. Dopo un pôc, Zuan al tache a vê sun. Un moment e lei Gjonde, un moment Marte, ce ben che al stâ, si indurmidis di colp.
Cuant che al si svee, il soreli al tache a lâ jù, lis frutis no son plui.
“Ma viôt tu, son ladis vie cence dimi nuie!”
Al fâs par tornâ in citât, forsit lis cjatarà inte gjelatarie.
Ma propit cuant che si dismôf, al viôt une pavee e une bolp. A van pe lôr strade, ben prest ancje la sô.

di ***
#21**

2 coments On CorseCurteAvrîl#5 – Bestiis a Palme

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît