CorseCurteAvrîl#04 – Nûf peraulis

#04 – Nûf peraulis

O Signôr!
Par prin al è partît il cûr, cui batits che a corevin un parsore di chel altri, simpri plui fuarts, plui svelts. Daspò la piel, che si jere inglaçade cuntun sudôr frêt che le veve imbombade, lassantji i pêi indreçâts come se a volessin jessi plui lontans dal cuarp. Chest frêt che al jere vignût sù dai pîts par rivâ te gole lu veve lassât finalmentri imbacuchît de pôre. E i budiei a vevin scomençât a movisi tant che madracs che a barufin intune poce cence aghe.
O Signôr!
In dute la gnot, nol veve tocjât il vin, par no pierdi la atenzion nancje un moment. A man a man che la lune e lave sù si jere sintût plui sigûr, ancje comut. Involuçât dal cjalt de gnot al crodeve di jessi rivât insom. Cheste trancuilitât e je stade la sô perdizion.
Al à vierzût la bocje par fevelâ.
Al à crodût di sedi lontan, che no lu varès sintût.
A son stadis dome nûf peraulis…
Il sunôr de gnot si jere distudât. Chei mil rumôrs muarts di bot e sclop intun moment distacât de vite. Jenfri un bati dal cûr e chel altri.
O Signôr, al veve sveât la Bestie!
In mût irimediabil, dut al è tornât a movisi.
La Bestie e jere rivade dal scûr cui voi ros, lis ongulis fûr des çatis, la bocje vierte intun berghelon che al sarès partît cuant che finalmentri i siei voi si saressin incrosâts. Cence cjalâ ator, fissade dome a cjaçâlu par vêlu jenfri lis çatis. Par zuiâ tant che i gjats prin di copâlu.
O Signôr!
Al veve dome un pinsîr che al jere restât cuant che ducj chei altris si jerin platâts spaurîts tai cjantons plui neris dal cjâf.
Un pari di famee al dovarès jessi stât plui atent.
Al veve di tasê par no stiçâ la bestie.
Dome nûf peraulis par fâ il montafin…
“Mi plâs di plui il frico di mê mari.”

di Passarute
#1235

1 coments On CorseCurteAvrîl#04 – Nûf peraulis

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît