CorseCurteFevrâr#23 – Tal dîs cuntune rose

#23 – Tal dîs cuntune rose

Al è stât un timp cuant che une rose no mi diseve nuie: o jeri indiferent aes sôs formis, al colôr, al profum. O vevi sierât la puarte ae mê vite e o jeri deventât vuarp aes manifestazions che nus met devant dai voi ogni dì. Si trate di rivâ a vierzi il nestri cjâf, se si è bogns di cambiâ ategjament, di vierzi i voi e soredut il dâ spazi al cûr, si reste tal scûr. Ancje un flôr al pues dâti un rai di lûs che ti rive fin drenti la anime, di mût che si rianimi chê cjandele eterne che e vîf di simpri in nô: il nestri spirit. Però o dovìn passâ traviers ciertis esperiencis che nus sarvissin a fânus preseâ la vite.
Cumò cuant che o cjali un flôr jo o amiri i colôrs, la forme. Cuant che o nasi une rose il profum al jemple i miei polmons, al jentre cun fuarce tal me cjâf e si font cu la mê anime. Intun vivâr di plantis o intun grant zardin, o pûr intal mieç dal bosc, il me umôr si trasforme, cjatantmi a contat cu la nature, cul creât. E mi sint un dut un cul Univiers. Alore o cjali il cîl e o dîs cence vergogne: – Graciis!
Un al podarès domandâsi: – Ma cuâl ise il scopo, il fin, l’intendiment di dut ce che nus circonde, e ce puedie rapresentâmi un flôr? Par tancj al pues jessi ancje un misteri, ma par me e je la manifestazion dal Creatôr, che nus cjacare cul lengaç dal amôr traviers dai flôrs, in plui di dut il rest. A son messaçs che però noaltris o dovìn capî.
Come par nô, i flôrs a àn bisugne di lûs, dal calôr dal soreli, di manutenzions, di cualchi potature, simpri di tante aghe pes lidrîs, e o cressìn ben se o vegnìn amâts. Dut al nas di une semence, sot tiere. E e à il jutori de ploie e dal calôr dal soreli. Tal moment just la semence e sclope e e comence la vite. E alore e cres la plante, lis ramacis, lis fueis, i flôrs e lis pomis. Dopo a planc lis fueis a deventin zalutis e rusinis e a tornin ae tiere che lis à fatis nassi. Chest ritmi ciclic al semee ae esistence dal gjenar uman. Si trate dome di rindisi cont, e prin o dopo e je la strade che ducj o dovarìn cjapâ, o almancul cheste e je la mê opinion.
La rispueste che mi soi dât jo e sta intune peraule: amôr, da bande del nestri Pari. I flôrs a son lì a dimostrânus in tropis manieris che Lui nus mostre il So afiet e la fantasie di dut ce che nus presente devant dai voi. Dut ce che al fâs e che al à fat al dimostre amôr. Se une rose e mostre cun orgoi al mont intîr la sô specifiche particolaritât, Lui nus invide a fâ altretant cu la nestre vite, dimostrant lis capacitâts e metintlis ancje a disposizion di cui che magari al à di mancul o nuie, lassant stâ egoisims, sêt di podê, protagonisims.
No par nuie flôr al fâs rime cun amôr.

di Il fi di Marie dal Cafè
#1198

2 coments On CorseCurteFevrâr#23 – Tal dîs cuntune rose

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît