#15 – Di perlis e di ranuncui
La femine e alce a pene i voi dai garofui che e je daûr a fâ sù tal celofan. Lui al pâr intrigât par dutis chês composizions sparniçadis pal locâl e pe int in spiete. La floriste lu ricognòs a colp e la muse si vierç intune bocje di ridi che e rive aes orelis.
“Velu! Al veve clamât îr, no mo?”
E va tal stanzin daûr dal bancon e e torne fûr cuntun mac di ranuncui.
“Vincj, juste?”, i domande, intant che i prepare il cont in casse.
L’om al passe denant di ducj, cun educazion, al paie e si volte viers la puarte.
“Augurons! Si viodìn l’an cu ven! Vincjeun!” i berle daûr la floriste.
Lui al spessee a lâ fûr, la muse platade intal tabâr, ancje se chest an Sant Valantin al à volût regalâi il clip di un biel soreli aviertan a ducj i inamorâts.
A cjase, sentât intal tinel, cul scûr che al tache a involuçâ la cjase vueide, al reste fer a cjalâ chês rosis poiadis parsore de taule parecjade par un. Al sta cussì, imobil, fin che i voi no rivin plui a distingui lis formis, po si alce e si invie viers la cjamare, cence cenâ. Intor al à ancjemò il gaban.
Di cualchi bande, une femine si poie sul jet disfat, cence vê mangjât nuie in dut il dì. I voi a son perlis di flum inneadis intune aghe che no sa di cori, ma che no rive nancje a fermâsi. Perlis che une volte si spieglavin inte voglade buine di un zovin daben, ma che cumò a àn dismenteade la lôr lûs e a bramin dome di jessi glotudis dal gorc neri de gnot. Une gnot che e rive ogni sere, di vincj agns incà, cuant che e à fate la falope di pierdi chês perlis intun mâr salvadi masse grant par lôr.
Il perdon al è un don che prin di domandâ a chei altris bisugne concedisi, ma jê no à mai rivât a frontâ lis fantasimis de sô cussience. Di là de gnot, une man e compon un numar che nol è plui in archivi, ma che e cognòs a memorie, po si ferme. Di ca dal flum, lis dôs perlis si poin sul vâs sul barcon. Doi butui a frontin la scuretât lenzintsi lis fueis un cun chel altri. A son ranuncui.
di Fuguline (Cjicechepicjedispicjelacite)
#1190
