#14 – La liende dal sbusenêf

Tant, tant timp indaûr, cuant che dut il grant lavôr dal creât al jere finît e dut al jere a puest… l’om al cjalave, al cjalave, ma al mancjave alc.
Al jere il cîl, il mâr, il soreli, la lune, e pûr i sameave dut frêt, desert, cence anime.
La tiere e jere cence vite, cence lusôr, cence besteutis contentis: cence flôrs.
Passavin lis stagjons e l’om al jere simpri plui malcontent.
Une biele zornade, eco rivâ la fade dai flôrs.
Ma trop biele jerie? Plui di biele, e jere une fantate bionde, cui voi come il cîl d’Istât, cuntun vistît colôr da l’aiar de Vierte: lizerin e a rosutis di ogni colôr.
Cun la sô bachete magjiche, jê e à fat une magjie: e a jemplât la tiere, lis culinis, lis monts di flôrs. Ogni sorte di gradazion, lôr, le vevin.
E a parevin propite bon e l’om al jere content e sodisfat. Cussì la tiere, plene di ligrie e profum.
Cuant che la fade a pensave di vè finît il so biel lavôr, eco une vosute, sameave che e vais. Veramentri, sì, e vaive, si lamentave. Al jere Unviêr, e jere colade tante nêf, blancje candide, come veli di nuvice.
Si sintive, simpri di plui, chê vôs: «Dome jo soi restât cence colôr e ancje cence non. Jo o restarai culì, sot de nêf, ingrisignît. E nissun lu savarâ, mai. Ooh, ce disfurtunât che soi».
Incorade, la fade, i rispundè: «Tu, che tu sês restât par ultin, ben, tu sarâs il prin. Intal finî dal frêt, tu, tu metarâs fûr il to cjavut blanc come bleon di lissive e tu disarâs al mont che la Vierte a rivarà a moments. Pal to coraç e la tô fuarce, jo, ti clami sbusenêv. Dome a vioditi, ducj a fasaran fieste e ti rimiraran cun gjonde intal curisin».
Di chê volte, ogni an, il sbusenêf, cun delicât cidinôr e tante buine volontât, a si fâs viodi, seneôs di mostrâ dute la sô bielece.
Ancje cence colôr.
No i covente, chel, par fâ ben il so lavôr.

di Pierina Gallina (Gjaline Padoane)
#1189