Pirulis di aganis 2

La agane tal borc

La setemane passade si è rote la machine di lavâ a cjase mê. Inalore o soi lât di buinore ae lavandarie par netâ i vistîts.
Cuant che o soi rivât al jere ancjemò scûr parcè che di Invier il soreli al jes plui tart.
Il negozi al jere cuasi vueit, a jerin dome un impleât daûr il banc e une zovine femine masse biele.
Cuant che o soi jentrât le ai saludade, ma jê no mi à rispuindût, e à tirât dilunc a sistemâ la blancjarie. O ai pensât che e veve un frut parcè che e veve tantis maiutis piçulis.
O soi lât dongje l´impleât par domandâ a lui trop al costave il servizi.
Fevelant cun lui o ai ancje comentât che e jere bielonone la morute che e sistemave i siei vistîts.
Mi à rispuindût perplès che no jere nissune femine te stanzie.
Inalore o ai cirût dapardut e no ai viodût nuie, dome i rais dal soreli sui veri de puarte parcè che al scomençave a cricâ il dì.

Augusto Bornancin
#1118

Secjarie

Chê gnot al è lât ae rive dal flum. Al voleve cognossi sô mari che e jere muarte chel dì che al jere nassût. E fo une fantate bielisime.
Le veve spietade par cinc oris, però al à viodût dome un grum di feminis lontanis sot de lune. A vevin vistîts neris, cjavei luncs e a cjaminavin cun sarpints ator lis gjambis. Cjalantsi une a chê altre, a lerin fûr disperadis, a berlavin cun lis mans parsore il cjâf.
Cence aghe, il flum no fâs aganis bielis.
Chest Invier, cun chê secjarie che e puarte “La niña”, nol à rivât a cognossi la muse di sô mari, chê muse che al veve viodût dome intune fotografie.

Maria Veronica Moscufo
#1119

(Il flum Paraná -il secont di Americhe- che al bagne la sô citât San Nicolás, chest an al à rivât ae sô cuote plui basse in cuarante agns. Une tragjedie ambientâl par efiet de “La niña” che e puarte secjarie tal estrem plui a sud de Americhe.)

 

 

 

1 coments On Pirulis di aganis 2

  • Biele le conte di AUGUST, indulà ch’al misture il timp di îr cun chel moderni di vuê . Ancje le conte di MARIE le cjati biele, a rivuardà il decjadiment dal nestri planet culì segnât de sicitât, fat cun tant di vêr intôr, a distruzi le bielece terene figurade simbolicamentri das antighis, e splendidis aganis, sfiguradis e avilidis a chel pont. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît