CorseCurte – La classifiche di Setembar

O sin rivâts a trê cuarts de gare e insome… e je propite ore di une biele classifiche gjenerâl e di dutis chês altris. E si ben che aromai ciertis posizions si tegnin cu lis ongulis, ancje chest mês no son mancjadis lis sorpresis.

Un podìn spiâ, tant par scomençâ, che i trê zurâts si son cjatâts dacuardi suntune robe: fâ la classifiche al jere une vore dificil! Tantis contis a partivin di ideis une vore buinis, che magari si smavivin vie vie, altris a jerin semplicis, ma une vore eficacis, e altris inmò a pandevin pôcs fats, ma contâts in maniere supierbeose. Insome… Il teme imprescj al à puartât a bielis contis e a son stâts 22 i ponts a disposizion di cui che al vinceve.

Ma vonde nainis! Ve chi la CLASSIFICHE DAL MÊS DI SETEMBAR

A la sô seconde vitorie di zornade, la scuadre dal Lupusinfabula e à comedât ducj chei altris cuntun biel distac. Doi zurâts su trê le àn metude come prime, e ancje al tierç e je plasude. Il pestel e jere une conte mareose, che ti meteve devant di une vision alternative de maravee e di un cjâf di opare, disvelant ce che al è platât, ancje se al è brut di savê. Insome… une biele prestazion!

Subit daûr une scuadre che no si spietaressisi: il Passarute, che cu la sô storie ancjetant plene di marum si è poiade juste devant di altris dôs scuadris di vertiç, cun contis pardabon bielis, il Cjicechepicjedispicjelacite e il Borussia Dordul (Sì, lu savìn che al è scrit Dorussia, ma l’Ostir al è strac e nol torne a fâ la imagjin) che aromai a no molin un colp. Come che a no molin chei trê che a vegnin daûr: Volketitrai-Liga, Sbreghebalon e Reâl Cocâl. E ce che al è di dì al è che ognidun al à cirût di fâ lavorâ la fantasie e lis lôr contis a vevi dutis ideis fuartis sot. Us conseìn di leilis. 🙂

E ancje une grampade di contis che a vegnin daûr a son pardabon interessantis, stant che i lôr ponts, cualchi volte, a vegnin di gradiments une vore diferents de zurie. Insome… plui si scrîf, plui si gjolt, nus vignarès di dî, cjalant tal complès la nestre Corse Curte.

E al va dit ancje des scuadris che a àn fat un pas fals, come il Tapioca City, il Copasse blu o il Gjaline Padoane, che no àn convinçût la zurie, forsit par vie de maniere un pôc zuarine o retoriche di tratâ il teme. Ma o savìn che a ciraràn di rifâsi za cu la conte di pôre. E a proposit di zurie, il public al à fatis lis sôs sieltis, premiant Aiar, dal Sporting Brugnul, tant che vincidôr e Catans intal cûr al secont puest, ma a son plasudis ancje lis contis dal Fi di Marie dal Cafè, dal Atletic Gjatui e dal Rosute Pelote, cussì come la conte vincidore.

Ma ce isal sucedût te CLASSIFICHE GJENERÂL, daspò di cheste zornade di campionât? Nin a viodi:

E insome… tai prins puest, come che al jere prevedibil, al è cambiât pôc, ma il Borussia Dordul e il Lupusinfabula a somein pardabon vê metût il turbo e no jessi par nuie stracs. E compagn si pues dî dal Reâl Cocâl e dal Volketitrei-Liga, che a tegnin bot une vore ben, cun ideis ferbintis. Cualchi segn di strache forsit lu mostrât l’Atletic Gjatui, il Copasse blu e il Barba Pisul Stentadizza Stentadizza, che dal sigûr a volaràn dâ dut te ultime stagjon che e je in jentrade. Come par altri il Passarute, il Sbreghebalon o il Sporting Brugnul, che a somein vê cjatade gnove fuarce e fantasie. Insome… Il campionât nol à dite lis ultimis peraulis e al pâr propit che si zuiarà fin tal ultim. Da rest, aromai o vin capît che une ventine di scuadris e à dute la intenzion di tignî bot, sì che, 20 ponts di podê fâ a saran disponibii a ogni zornade.

E i letôrs? A ca al è sucedût l’impensabil. O vin une gnove letore a cjâf de classifiche e lis primis posizions si son scurtadis une vore. Ve chi LA CLASSIFICHE DAL FANTACORSECURTE

Al prin puest si place Nene, premiade di une azion costante e certosine su la sielte des contis, ma che no pues cjantâ masse vitorie, stant che e je vere che e à passât la capoliste Noemi Salva, ma a si son ben svicinâts ancje chei daûr, come la gjatemarangule e il lupusinfabula, che insieme al Volketitrei-Liga a parìn vê bon voli par scometi su lis contis. Ma insome… achì pardabon dut al pues cambiâ e ancje intune sole zornade… Il FCC al è une vore stuzighin, a nivel di classifiche!

Ma cheste tornade o vin ancje un vincidôr. Anzit, la robe plui incredibile de classifiche de Istât e je propite cheste: o vin doi campions di Istât! Cjalait ca:

Il Lupusinfabula e il Borussia Dordul si son plaçâts a pari ponts, 62, spartintsi ancje lis vitoriis intes trê zornadis. Come che o vin fat inte stagjon passade, ancje par cheste o darìn in premi trê libris, scomençant dal Borussia, stant che il so scart cuadratic medi al è plui bas, di pôc, ven a stâi che in medie al à vût votazions plui lineârs de bande de jurie. Ma pe classifiche morâl, al reste che cheste Stagjon e à doi vincidôrs. E tierce, une altre volte sul podi, ancje se par un sbit, e rive il Cjicechepicjedispicjelacite.

E cumô o sin propite pront par tacâ lis ultimis trê zornadis de Corse Curte!