CorseCurteSetembar#18 – Un lavôr come un altri

#18 – Un lavôr come un altri

Ve chi pront l’armamentari par doman buinore. I notabii judaics si son premurâs par ben di vê dut in ordin. No son nancje passâts di Pilato, tant a san che a decidi lis robis impuartantis a son lôr e no chel cocâl di governadôr.
Jo, come fari o soi brâf, no dîs di jessi il miôr di Jerusalem, ma sigûr o soi chel che si fâs mancul problemis a preparâ i imprescj juscj pes fustigazions e par meti int in crôs. E mi rangji ancje a fâ il marangon, il cjaliâr e cuant che mi domandin “Ma sâstu fâ ancje il…” jo no spieti nancje che a finedin la frase e o rispuint “Cence mancul!”
Pal condanât di doman – a disi il vêr nol è ancjemò stât condanât ma si sa bielzà – o ai fat lis robis par ben, come ch’al é just par un pesemoscjis come me.
Nol é stât facil decidi ce preparâ.
La “ferula” in len o in corean mi someave masse pôc, par vie che e ven doprade par dai tes mans ai fruts cuant che le cumbinin masse grosse.
Ancje la “virga” mi pareve un strument pôc adat al om che mi àn contât jessi chel sacrabolt di un cjalçumit. La “virga”, simpri in len di olm o di bedoi, ugnule o in fassinis, le dòprin par i sclâfs che no stan ai ordins dal paron. Chel chi mi àn dit che nol à parons e nol é paron di nuie e di nissun, che al sta cu la int, robis di mats.
Ma il “flagrun”, che piês no si pos, chel al é l’imprescj par lui. Un imprest di chei che ti jentrin te piel e te cjar, e che dai tais che al lasse e ven fûr la anime prime che il cuarp le torni ae sô nature eteree, cun fintremai chês piçulis laminis di fier insomp di ogni scarabaç par fâ sintî ben tal cûr dal pecjadôr la presince dal podê roman e de sô crudêl matetât.
Nô Ebreus o vin une regule: mai plui di trentenûf vuiscjadis, parcé che ae numar cuarante il puar om al mûr par sigûr. Ma i Romans no van daûr a chestis monadis e a rivin a cent o centecincuante cence remoris.
Fat, dut a puest, il “flagrum” al é pront cun dut il rest, copis, seglots e peçots cjapâts dentri.
Cumò o speri dome che a vegnidin chi par domandâmi di preparâ la crôs par chel “re dai judeos” cussì di puartâ a cjase cualchi sicli pe famee. O ai tredis bocjis di disfamâ.

di ***
#1***

1 coments On CorseCurteSetembar#18 – Un lavôr come un altri

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît