CorseCurteSetembar#13 – Il regâl dal babau

“Il babau” di D. Buzzati

#13 – Il regâl dal babau
Chel maladet di armaron di cocolâr al criche e al clope come par clamâmi tal scûr. A ciulin te gnot chei cancars e a sdrondenin chei plans di peç che mi pâr fin impussibil di sintîju dome jo.
A son agns che o voi indevant a dî a mê mari che dentri al è il babau. Jê ancje mi crodarès, ma ogni volte che e jentre te cjamare e e vierç l’armâr, il babau si plate!
Jo, a dî la veretât, no ai pôre di lui e par me nancje lui nol vôl scaturîmi. A lui i interesse dome rompimi lis citis par fâmi pierdi il sium. Nol è propit un vêr babau ma al è un boboròs, ven a stâi un babau ma frutin.
Ogni gnot, sul bati de miezegnot, chel danât al vierç in sfese la portele.

GNIIIIIIIIC…

e intant che dal armâr a vegnin fûr schiriis di lacais neris e slichignots, a scjampin vie sdrumis di pudiesis pestifaris dutis snacaiadis e si sparnicin sgarpionats che a stomearessin ancje il plui bocon dai oms… lui al gjave fûr un imprest lunc e imberlât, parecjât sù cuntun filistrinat sutîl e stuart dut rusinît e plen di pleis dulà che, te ponte, tacade cuntune gote di pês e leade cuntun fîl di cjanaipe, e je fissade une plume di gjaline faraone dute dispilucade. E cun chel imprest arcibolic e malnassût mi fâs ghiti propit tal agâr dal cûl e, a pene che mi svei…

ssssSSSGNACCC al tire dentri intun lamp il trabacul!

Eh ma usgnot si ribalte ben la fertaie! Tai dîs passâts o ai metût dongje un argagn finâl cuintri di chê figure porche.

A 11:59’59”, 1 secont prime de miezegnot, al tache a sbisiâ alc e…
GNIIIIIIIIC… si mostre la plume ma… cuntun lavôr di alte inzegnarie o comandi cu lis manecis di sot dai bleons une tanaie bocognone perfete par çoncjâ l’imprest babauesc… e sssSSSAC!!!

Chel puar boboròs nol jere trist e no si meretave di jessi taçât tal mieç par erôr.
Cinc gotis di sanc a son deventadis perlis neris.
Une pal scûr smavît de gnot,
une pal rivâ grivi dal dì,
une pai sgrisui di pôre dai fruts,
une pai voi discocolâts che no vuadagnin mai il sium
e une par mê mari, dentri di un sacut di fin vilût blu.

di ***
1***

1 coments On CorseCurteSetembar#13 – Il regâl dal babau

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît