Americhe

gaO jeri inmò frutin di tete co scomençài a sintî la peraule Americhe, o cressei cun jê za che no sintivi a fevelâ di altri. Se o cjali indaûr tal passât, ducj i oms zovins de mê famee a levin a vore come stagjonâi in paîs forans. Daspò e rivà ancje la vie dal oltrimâr.

La mê cjase e je simpri stade une cjase di feminis, di vecjos e di fruts. Cuant che i oms a tornavin, lis cicognis a fasevin il nît sul fumarûl, gjonde in famee se a rivavin mascjuts, che di grancj a saressin lâts pal mont, daûr des olmis dai paris.

Te aule de scuele o vevin un mapemont, cun lui, il mestri nus insegnave gjeografie, – Joisus! – o disei cjalant Americhe, chê part di monte e jere un continent bocon fûr di misure che e traviersave verticalmentri une part de sfere de Tiere.

Ogni tant a cjase a rivavin letaris cun bustis e boi di diferents colôrs, cartulinis stranis di puescj oltrans. Man man co cressevi o rivai a vê une discrete cognossince di chei lûcs, dal sigûr straplens di int e di feveladis diferentis. Viodint ce grandonon che al jere il teritori, mi fasevi tantis domandis:
Cetantis voltis jentraressial il Friûl in dut chel sît? Cemût fasevino i furlans par podê cjatâsi tra di lôr cun chês distancis?
Par dî il vêr, o restavi a bocje vierte come un cocâl, cence podê dâmi rispuestis.

Lessio a dutrine, lessio a scuele o dulà che il moment mi menave, no podevi fâ di mancul di fevelâ dal teme, di fat, cuant che i miei amîs mi viodevin rivâ, nol jere un che nol disès: – velu, velu, al rive il merican! – La veretât e je che o volevi cressi ae svelte par podê onorâ chel mandât familiâr.

A disin che dut chel che al mene al cres, ancje jo o rivai a la etât juste. Une dì, rivant a cjase, o cjatai mê mari gnervose, no si dave padin, mi cjalave come mai lu veve fat. Sore la taule si viodevin dôs bustis. Une e vignive dal distret militar e chê altre di oltrimar. La prime, di sigûr mi intimave a presentâmi tal ufici distretuâl. O cjapai sù chê altre. Le stazavi zirantle tes mês mans clopadicis e maraveadis. O savevi ben cui che me mandave e ancje ce che e contignive, di sigûr un at di clamade e un biliet par cjapâ il bastiment. Si sierave cussì l’atavic mandât di famee. O vevi li a puartade di man, la tant bramade e ansiade destinazion.

Americhe mi spietave.

di Galliano di Buenos Aires
#1308

1 comment