La sucession di Fibonacci

A scuele o vevi studiât le sucession di Fibonacci e no viodevi le ore di cjacarâ cun barbe Toni par cognossi le sô opinion sui cunins.
Barbe Toni al jere un vieli gno vicin di cjase che al tirave indenant cu la minime e che al tarondave cu la verdure dal ort e i nemai dal curtîl: une dozene di gjalinis, cuatri razis e dôs cuninis che al tignive come un dêt madûr. Ogni tant, a turni, lis puartave, intune borse di scus di panole li di Gjildo, che al veve il mascjo che lui nol podeve permetisi di mantignî, e dopo si gjoldeve i cuninuts. Fibonacci (che in realtât si clamave Leonardo Pisano) al jere un matematic che, tal 1223, al veve vint un concors, inmaneât dal imperadôr Federico di Svevia, par ve savût  risolvi un probleme sui cunins: “Se in Zenâr si met une cubie di cuninuts, a pene nassûts, intun puest, circondât di une muraie, tropis cubis di cunins si varan a le fin dal an se ogni cubie, dopo doi mês di vite, e tache a produsi une gnove cubie al mês?” In Zenâr, al veve pensât Fibonacci, e je une cubie sole e cussì ancje in Fevrâr. In Març a saran dôs (le prime e che nassude gnove). In Avrîl a saran tre, in Mai cinc, in Jugn vot.  Metint i numars in file… 1  1  2  3  5  8 , Fibonacci si jere inecuart che no coventave lambicasi tant par savê il numar di cubis dal mês dopo: bastave fa le some dai numars dai doi mês precedents. Cussì al saltave fûr  che tal mês di Lui a saressin stadis tredis  (5+8), in Avost vincjeune (8+13) e cussì indenant fin a Dicembar che saressin stadis centecuarantecuatri (55+89): 1  1  2  3  5  8  13  21  34  55  89  144.
O pensavi che barbe Toni al fos stât a cjalami in muse nome par educazion e, invezit, a la fin mi à dit: “E cussì, a scuele ti àn insegnât che se tu compris une cubie di cuninuts, al  prin dal an, tu varâs 144 mascjos e 144 feminis tal mês di Dicembar?  E, cence spietâ la mê rispueste, si è voltât di schene e al è lât vie bruntulant come il maltimp. No soi sigûr, ma o crôt che al stes porconant.

di Franco Vigo
#801

2 comments