I compits dal mês di Novembar

Otubar al è stât un mês plen di fastidis, se anin a cjalâ lis consegnis dai compits dai nestri arlêfs de ScueleCurte, che in cuasi mieçs a àn consegnât tai ultins dîs. E pûr, al pâr, i temis a vevin stiçât une vore, soredut Matematiche, Furlan e Gjeografie… Ma vonde, no si cjale indaûr ma si cjale indenant.

(Ma achì o podês scjamâ un comut pdf cu Lis Contis di Otubar)

Veiu ca, che a son za pronts i compits par il mês di Novembar!

Duncje, tachin dal prof. di FURLAN P.K. che al à pensât ben di lâ a cjoli un autôr, ma soredut une opare, che par cui che al cognòs un pocje di letarature furlane al sa ben che al è un prime e un dopo, rivuart a chel libri. O fevelin di “Donald dal Tiliment”, opare di Stiefin Morat, che al è ancje un nestri Contecurtâr e nuiemancul che vincidôr de CorseCurte24. Achì o cjatais la stiçadure dal professôr P. K. che, moderni come pôcs altris, no us invide a lei il libri, ma… us invide a scoltâlu! Ma nol covente cjacarà masse. Par cui che al vûl tentâ di scrivi alc di inovatîf e fûr cu la cassele, o di jentrâ tal mont sureâl di Saco e Pidins, che al viodi i compits e che al scrivi di gust…

E come materie e torne SIENCIS, e chest colp il prof. A. M. al tire fûr un teme che si preste a interpretazions di ogni sorte. Il lôf, al à metût come titul, ma dentri o cjatais i riferiments a un lôf particolâr, che o cognossìn ben e che al à dute une storie dentri de storie. Daspò si sa, a ca si pues lâ di fantasie o pûr restâ dongje dal teme… A son pardabon pôcs palets di sghindâ par scrivi la conte, e cuissà, magari al sarà chel argoment par cui che al à voie di fâle facile o pûr chel par cui che al sa che il lôf e je une figure impuartante par cetantis culturis, comprendude chê furlane.

E daspò des Siencis e torne ancje la materie di MUSICHE e il teme dât dal prof. M. A. che al decît di fevelâus di une robe che ducj, forsit, o cognossês… La Radio! E dulà lâ a cirî la furlanitât de lenghe furlane si no te Radio Onde Furlane, che dal sigûr in tancj a cognossês. Po dopo, no si domande di fâ une conte su ROF, a mancul che no vedis voie propite di scrivile, ma si contentisi di une conte su la radio… e ancje ca la libertât e je grande.

E stant che intal mês di Setembar TECNOLOGJIE e je stade une des materiis plui sielzudis, ve che il prof B.M. al vûl lâ indenant a stiçâ e al tire fûr alc di imprevist e fûr scuare sore un argoment une vore atuâl. Sì, o vês capît, si fevele di Inteligjence Artificiâl, ma no come che o crodês voaltris. A chi, lis Alucinazions a àn dut un altri sens e a son, adiriture, benvignudis. Par chei che ur plâs contâle gruesse… ben po, ca a cjatais il compit che us confâs.

E STORIE? Tornie? Ma sigure! Il prof. C.P. al à decidût di jessi un tichinin plui a la man e lâ a cirî un cantin une vore particolâr… Diu! Ma no stêt vê pôre, no nin a tirâ fûr la religjon, o miôr, no la religjon di cumò! Par storie, chest mês, si pues ispirâsi a divinitâts che o vevin un timp e soredut a une, che ogni 6 di Zenâr nus regale une des tradizion plui amadis e partecipadis dai furlans… Il Pignarûl, dediât, come che o savês, al Diu Belen! Che po, us sigurìn che nol è volût, ma il Diu Belen al è ancje chel dal logo de Radio dal prof di musiche…

E par sierâ, stant che al jere un pôc tart, o vin il compit di LENGHE FORESTE, ven a stâi talian. Il nestri Prof V.G. al cîr di fâsi perdonâ fasint scuvierzi un libri di une autore di Pordenon che e vîf a Triest. Jê e je Carmen Gasparotto e il librI – Chiavi di riserva –  al conte dal Friûl dai Agns Sessante e dal passaç tra vite di campagne di citât. Clare che cui che al à let il libri al à une marce in plui, ma ancje cence vêlu let la vite familiâr furlane prin dal Sessantevot, soredut pes feminis, e à cetant di contâ. Nol è dal sigûr un teme facil, par cui che al à vivût chest periodi o lu à sintût contâ al è dal sigûr alc che al stice.