Une setemenane indaûr, se si visâis, o jerin impegnât intune peffomance comiche e curte in chel di Teôr… ma parcè? Ma clare! E jere nuiemancul che la adunade dei furlans e come che o savês (e se no lu savevis cumò lu savês) l’ultin arîf intal trop al è propit Maximilian Glîr, l’Archeolic de Ostarie.
E in sumis… vustu che al è jenfri chei che a inmanein di un pâr di agns in ca la iniziative, vûstu che nus veve imprometût di clamânus, noaltris no si podeve disi di no e par ringraciâlu, lu vin ancje coinvolzût intal mini spetacul.
E come simpri, par sierâ i zûc e mandâ il materiâl ae nestre Sartore che e taie e e cûs par meti inte pagjine In cjar e vues, ve che us lassìn un pocje di croniche.
No che al sedi masse ce dì, o vin vût une vore di plasê di viodi un pôc di teatri, fâ cualchi ridade cun Moret, cjapâ gust a meti adun il bancut cui libris de Ostarie e dal Ostîr e dopo l’event, gjoldi a bevi une buine Furlan beer, mangjâ cjarsons e afetâts e frico e fâ una partide di discors, in spiete dal concert dai FLK. Ven a stâi, metint dongje dut, pardabon une biele manifestazion!
Il spetacul? Cuntun Glîr ae conduzion il nestri Ostîr al è deventât nuiemancul che un Sensitîf, ancje se no tal sens che o crodês voaltris. E cui podês di sensitîf al à clamât sul palc prime un cul mâl dal modon (il Muini Stiefin), po dopo une invasade di mangjative furlane (la Sartore Astrid) e insom un ultracontadin (Checo il Famei). Pecjât che la domande riveladore che i à fat e à rivelât che al à fatis trê falopis. Il prin al jere nuiemancul che l’ultracontadin, la seconde une glesote peteçone e il tierç adiriture un nazigrammarfurlan. Dut câs, o vin cjatât i fantastics furlans che o cirevin!
E cuntun graciis ae nestre gjatemarangule e a Pierina pes fotos, ve ca, par cui che nol jere, un sbrendul dal copion, juste juste par savê ce che si sês pierdûts 🙂
[RA] Che siore li, soi sigûr! Oh, mandi siore! Ben adunade cun noaltris. Che mi disi subit ce che si clame… anzit, no. O soi un sensitîf, induvini jo!
RA al cjale sul copion
[RA] Jê si clame… ASTRID! Astrid? Ma pardabon?
[AS] Se no lu sa lui che al è sensitîf.
[RA] Ma ce saio, magari al jere un non par dâ un tocco di internazionalità. Bon. Nin indenant. O tacarès subite cu la domande par viodi se je a rapresente furlans che a mangjin furlan.
[AS] Va ben. Soi pronte.
[RA] Duncje, îr di sere, sù par jù a che ore ca, jê, dolà jerie e soredut, ce aie fat di mangjâ.
[AS] Eh… îr di sere pôc e nuie, anzit nuie.
[RA] Cemût? No à cenât?
[AS] Eh, no. Parcè che îr di sere prime o vevi di lâ a gjespui e dopo al è muart Meni Brantiel, il pari di Vico Moscje, chel a stâ insom de braide dai Dris, chei che la gnece si è maridade dôs voltis e la seconde cuntun om divorsiât eh, che al veve za un fi. E la femine di prin e jere la sûr dal cusin de agne Ghine. Ajal presint?
[RA] Fi di cui?
[AS] Dal cusin de aghe Ghine, i ai pûr dit! Fie di Meni Palòs, il fradi di…
[RA] Bon BON BON. E ce jentrial dut chest?
[AS] Insome, ven a stâi che o scugnivi lâ ancje a rosari!
[RA] Bon, lassin pierdi îr di sere. Anìn a la sere prime. Ce vevie par cene…
[AS] Ah, no, no. La sere prime juste juste una scjatolete di ton, che o vevi di lâ a provis di coro de parochie e no vevi timp di preparà nuie.
[RA] E alore… provìn a gustâ! Ce vevie devant dai voi sul misdî… Scomet un biel F… F… FR….striçulis, civole… un biel. FRRRR….
[AS] FREDO! Chel di Palaçul! Lui al è propite un sensitîf! Insome, No i isal vignût un imbast intant che al jere a cjamâ un spolert par sô cunsuvrine Virgjinie, la fie di Turo Triscule! Ce disgracie… al veve pocje parintât e no si podeve mighe lassâlu di bessôl… e alore, sajal, soi lade a fâ dôs oris di vegle juste sul misdì.
[RA] BON! Ma magari in taule al jere un biel FR… FRRR…
[AS] Frêt! Eh… Fredo al jere frêt. Saial, cuant che un al è muart. Par fortune che il pisighet al jere Pieri Muc, sajal il nevôt di Iano Marchete, chel che a veve di lâ predi? Se nol ves cjatade Lene Bisate… ah, ce scandul!
[RA] Bon bon bon! Vonde, o vin capît. Siore, e pues lâ. O soi convint cualchidun di ducj chei che e cognos je al à dal sigûr mangjât frico. Esperiment jessût!
