E je tacade la gnove stagjon, la Vierte, ancje se fortis o vin un tic di masse ploie, ma i nestris mus no àn dal sigûr pôre de ploie e a son partîts in tancje ancje chest mês di Avrîl. Nuiemancul che 28 su 31!
Il teme di Avrîl al scomençâve a sei impegnatîf, stant che la gare e va indenant e che nus plâs che mês par mês lis robis a cambiin simpri. Si domandave ducje al mus, Tu Scrivarâs une Conte… in prime/seconde/tierce persone singolâr/plurâl e ogni tant specificant se masculine o femenine. Insome… Al podeve capitâ alc che un mus nol è usât fâ. E volêso savê in gjenerâl ce che o pensìn? Che e je lade benon! A son saltadis fûr tantis bielis contis, e soredut, cuntun stîl diferent dal solit.
La classifiche di Avrîl e je cheste ca:
(Se o sês cul telefonut e la imagjin e je piçule, le metarìn ancje in Instagram e su Facebook).
ATILE FLAGJEL DI DIU! Eh, sì, al è capitât un di chei câs dulà che un mûs al è partît in fughe, al à dât un distac a ducj chei daûr e nissun al à rivât adore a cjapâlu. Atile, cu la so conte in seconde persone singolâr, Riproduci, al à metût dacuardi dute la jurie e dut il public. Medie altonone (26!), scart cuadratic bas (mancul di 1)… Par chest mês al à dominât. Si candide bielzà par jessi protagonist de Vierte.
Ma une musse i veve stât daûr fintremai ae ultime curve, ven a stâi Teresine la çuete, che cun Amîs di une vite e à trat un colp no di pôc, e cundut di chel, une vore atuâl. E ancje ca, o vin une medie di 24, e un scart bas.
A sierà il trio, un altri mus di chei che no si proviodeve, Matungo, cun Ti prei, toc che al tocje temis une vore dificii. E al è di marcâ che dutis trê lis contis a vevin come teme la 2de persone singolâr.
Ma pe zurie, al va dit, lis contis di notâ a son stadis altris. Eliopause, par esempli, conte di lei plui voltis di Catine la Nere, e à brincât nuiemancul che doi prins puescj par doi zurâts, e Robarie, une vore origjinâl, si ben che cun jê Ippogrifo al è lât a finîle a mieze classifiche, al à meretât un altri ponti di bonus. E altre segnalazion par LÔR, di gnûf une conte diferente des altris, e Animulae, di Daûr la Lavagne e Derna.
Cjalant di chê altre bande la robe, Gato, Secretariât e La Ciachegna no àn cumbinât di scrivi la conte, ma dome chescj ultins doi si son salvâts cul bonus No Cumbini.
Par Avrîl, dut câs, us conseìn di lei ancje Al vaive ancje il soreli, Te largjure, Splatter, Tu strie jo fade e Flamis. O vês ce gjoldi.
Anìn al FantaCorseCurte, che al sta deventant une gare a eliminazion, stant che tancj a si smentein di scometi, e a pierdin il turni. Ma no dal sigure i prins, che puntuâi a mostrin di vê nâs. Chest mês il public al à vude reson e Muspilli al à rivât a soflâ il puest ae Gjatemarangule, ancje se di pôc. In fuart recuperi ancje Derna, Ippogrifo e Ombre Grise… ancje ca, la gare e je une vore ma une vore vierte… come la Stagjon, insome. E di daûr a tachin a vignî sù parfin dai gnûfs scometidôrs
E pe CLASSIFICHE GJENERÂL? Isal stât cualchi scombussolament? Eh… no masse, ma disìn che al è stât un compatament. Brene Sfolmenade e Catine la Nere a son ancjemò in teste, ma a àn pierdût ponts (pûr pûr restant i unics doi mûs che a àn cjapât plui dal 80% dai ponts a disposizion). Al tierç e al cuart e cuint puest, di fat, a son rivâts mus gnûfs, Glorious Grene, Atile e Muspilli, che cumò pardabon si proponin di metisi a sorpassâ… E di daûr al pâr che Teresine la çuete e Nonio a rivin a pitinton, tignût cont soredut che Torototele, Secretariât, Nevio e Daûr la Lavagne a son sbrissâts. In sumis, une classifiche che si è scurtade une vore e cul teme di Mai, cun diferencj gjenars leteraris, al podarès messedâ une vore lis robis… E lis contis che a son rivadis, a dîle dute, a prometin za ben…
O sierìn cuntune considerazion dal Ostîr, che dopo 4 mês al pues fâ un confront jenfri la CorseCurte22 e la CorseCurte24. A rivin tantis plui contis, e in medie lis contis a son une vore plui misturadis, ben costruidis e ancje cuant che a rivin in bas, lu fasin cun ponts alts e gradiment di zurie o public. Insome… il nivel al è bon. Altre considerazion e je che par cumò la plui part dai mus no à molât e si spere che si rivedi cussì, cun trente contis al mês, fin ae fin dal an. Ancje parcè che la classifiche e je un zûc, la vere motivazion de gare al è metisi a la prove ogni mês cul teme e viodi ce che si cumbine. E al pâr che in tancj lu stedin fasint. E cun di plui, ancje lei lis contis dai aversaris, o chês che a vincin, al è di insegnament. E po, ultime considerazion, vere che la classifiche e je par divertiment, ma al è biel che fin cumò a àn vinçût 4 mus diferents, nissun al pâr sedi in grât di fâ il dominatôr de gare, e anzit… i prins 14-15 mus, sedi par matematiche, ma sedi soredut par cualitât des contis, a podin rivâ sul podi o vinci une stagjon.
Noaltris si sintin miercus matine che al ven, ai 22 di Mai, a OndeFurlane, cun RadioCorseCurte24 che e fasarà la solite radiocroniche di Ticât dai Mus. Se si sês pierdûts alc… la pagjine de CorseCurte e à dentri dut.
