Udin, ai 11 di Setembar dal 2021
Cort di Palaç Mantiche – Vie Manin
Il 2021, pai events e par comparî in cjar e vues denant de int, al è stât forsit ancje plui dificil dal 2020, no tant pe pussibilitât, che par fortune, in gracie de vacine, si cumbinave avonde ben, cuant pe sflacje che ti ven cuant che tu tachis a no fâ une robe. Sì che, chest event, prudelât de Societât Filologjiche Furlane, al è stât, in pratiche, il prin de anade. Si tratave di un spetacul par sparniçâ la gnove di un acuardi pe publicazion di un libri che al tegni dentri Lis Contis dal Mês di dut l’an e noaltris, invezit di cjacarâ di dutis, o vin ben pensât di declinâ la robe cul mês che o jerin, ven a stâi, Setembar.
Sì che duncje, o vin fevelât soredut di benandants, misturant cualchi toc robât ae conte dal Ostîr, Fros, e cualchi toc cjolt di altris libris che a tratin l’argoment, come Madalene, di Franco Marchetta o Il formaggio e i vermi, di Carlo Ginzburg. Il nestri Ostîr al faseve di benandant, la nestre Coghe e faseve di strie, e il Berlon, subit votât ae cause, al interpretave i libris.
Nol è stât propit un spetacul facil di intivâ, stant che i tocs de conte, che e fevelave di Bertran, un contadin dal dì di vuê, a jerin scrits intun furlan visionari che al contave la vuere jenfri benandants e striis, a colps di fenoli salvadi e soros (come che a vevin in man Ostîr e Coghe). I tocs de incuisizion, di chê altre bande, a jerin scriture datade, cul so estri e il so jessi dongje al latin.
Ma no je finide chi, parcè che o vin metude in vore ancje la Sartore, che invezit di cusî robe informatiche, chest colp e à cusît la colone sonore de serade, fate cun sbrendui robâts a musiciscj furlans come i Francis and the Phantoms o gli Autostoppisti del magico sentiero, ducj i doi une vore sugjestîfs. E une biele figure le à fate ancje la senografie: une taule insiorade di ue, fîcs, miluçs, miluç di sepe e altri che in gracie dal intervent dai benandants al è stât regalât ae stagjon, cu la bataie dal Cuart Timp.
E simpri in gracie de Sartore o vin recuperât un cavalet e un microfon e o vin provât a meti dongje une direte Facebook che e vedi un pocje di plui di cualitât dal solit. E cundut che si jere te suaze di Friuli Doc, o vin vût ancje un public une vore interessât e content, che intant che al spietave al à podût discjamâ ancje il test par discuvierzi se al jere Benandant o Strie, cuale bestie che al cjavalgjave e cuale plante che al tignive in man in bande di soros o fenoli. (E us al lassìn ancje a voaltris di discjamâ, doprant come numar par fâlu la zornade che o sin vuê, che lu discjamais).
Riferiments
