Mandi Polente

Al capite, come che nus è za capitât e nus capitarà inmò, di scugnî saludâ cualchidun par simpri. E come che dispès al va a finîle, intal saludâlu, no si fevele tant di lui, ma di nô e di ce che nô si impensin o vin fat cun lui. Sin fats cussì.

E chest colp, magari cussì no, al è capitât propit cuntun che o cjatais te pagjine de Ostarie, ancje se al è di tant che no fasìn plui spetacui e o vin ocasion di incrosâsi. E in chest mont che dulà che no si incrosisi mai, a son simpri i sociâl a visâti che ducj a san dut di ducj, o vin savût che îr nus à lassât il Polente, il poete de Osterie.

Franco Polentarut, poete al jere pardabon, sedi tes poesiis scalembris scritis, sedi te sô maniere scalembre, visionarie, pasoliniane, bukowskiane e trotzkiste di vivi. Nus à regalât, lui tant che metât dai Rive no tocje, des seradis che a son sculpidis te storie live di cheste Osterie. La cjançon che e restarà par simpri l’imni di Contecurte e je “Cjasottis” (Eh, si, lu savìn ben che nol è chest il titul just, ma par noaltris e je cussì). Dificil smenteâsi di chês seradis a San Zorz, cun chei doi scjampâts di cjase e lui cun chel ostie di clarinet che nol saveve sunâ, ma al sunave istès (e da rest al jere un sunadôr di cuarnete definitive). Par no cjacaràâ de sere che si è presentât di bessôl e e jere proviodude la musiche e lui si è rangjât a colps di poesie, tant che “artista del popolo” come che al jere; o dal spetacul a Vildivar, cun Bizio e il Polente vistûts di fraris che a parevin plui vêr lôr che ducj i fraris di chest mont. Po dopo, nol jere un che si tignive di cont, lu savevin ducj, ma no si pues pratindi che al sedi a plomp un che al à let dôs voltis ducj i libris dal Ostîr. Lis robis, par solit, si disin e si capissin simpri dopo che un lis à fatis e vivudis, ma par cui che lu cognosseve ancje dome un pôc, o crodìn che nol sedi nuie di strani a definî un come Franco un inteletuâl, tal sens plui larc dal agjetîf. Sì che duncje, a un che al viveve passant di vagine fotovoltaiche a gulizions austroungarichis, no nus reste che disi un galvanic mandi e ariviodisi Polente.