ScueleCurte_Musiche11: ROF!

ROF!

Quarantecinc agns plui un di vite! Par il mont de radiofonie “indipendente” (ancje par che “taliane”), un vêr meracul. Ma par i Furlans, i meracui no son un fastidi, dome un mieç par tirà fûr il miôr. Cussì, in chest an dal Signôr 2026, il meracul al è ancjemô li. E dal sigûr par restâ!

Prins agns tal gratecîl di Plaçal Cella, dopo te sede aromai “storiche” di Vie Volturno, al numar 29, soredut par cui che si vise dal CSA 3Blinka, propit denant de puarte de palacine, ce timps…

O vês capît… si fevele di Radio Onde Furlane.
Radio Onde Furlane e je le vôs, pardabon, dal Friûl che si sint libar, dai Furlans che a crodin te lôr Culture, te lôr tiere, te lôr Patrie. E ROF, di simpri, e sburte le Musiche che, come jê, no intint sei sotanade dal marcjât, dal conformisim, de mediocritât, ancje a risi di lâ cuintri de masse.

Cemût? Anìn a dâ un cuc.
Cuntun palinsest insiorât di trasmissions che incuvierzin ducj i “gjenars” de musiche, no dome “moderne” e no dome “alternative”. In gracie ae vision di chei che Radio Onde Furlane le àn fate nassi! Claminlu il “spirt guide”. Ogni dì, sotsere ma ancje dopomisdì, si scoltin programs condots di une cubie di colaboradôrs apassionâts (fin fanatics!), cultôrs pe grant part volontaris, e punk, hard rock, sperimentazion, dark a son dome dai riferiments, parcè, miôr tornâ a dî, si scolte pardabon di dut, e pe plui part di biel. Musiche cuinçade di informazions, storiis, fufignis, bardelis, che il mont eterogjeni e vivarôs dal “rock” al vîf ancje e forsi soredut di chei. Cussì ROF e je une vôs avonde uniche, nissune emitente (dal Friûl e no dome) e olse cussì tant intes sieltis strategjichis e musicâls, ma… se un si proclame libar… Impegn, cualitât, voie di metisi in zûc, ma ancje un tic di mateç par insavorî un palinsest palinsest.

Par chel che mi conven, tai prins agns Otante, il dopomisdì, sierât te mê stanzie, finît di fâ i compits, vie di corse a impiâ la radiute a transistor. La ruede fissade sui 90.00 Mhz (za ta chê volte, sì). Un univiers di notis e di peraulis a mi spietave.
E tocje daûr reson su la robe che a ripetin simpri, di chê volte inca: Dute une altre Lenghe, dute une altre Musiche.

Materie: Musiche
Mês: Novembar
Prof. M. A.