ScueleCurte_LengheForeste11: Chiavi di riserva

Cjars students, ancje chest mês mi tocje di scusâmi pal ritart! Us promet che nol sucedarà plui! O speri che podarês perdonâmi dopo che us varai fat cognossi une autore de nestre regjon pardabon speciâl: si clame Carmen Gasparotto e e je nassude in province di Pordenon, ma e vîf di tant timp dongje Triest, e il so libri plui biel al è “Chiavi di riserva”.

E je une conte autobiografiche jenfri dôs epochis, jenfri il prime e il dopo di chei agns Sessante che e àn cambiât in maniere cussì radicâl la vite e il sintî de gjenerazion nassude tal boom economic. Un romanç curt che al puarte tal cûr dal passaç, intun moment dulà che la campagne no jere za plui il lûc dulà che si faseve la storie, ma i siei mûts e li ssôs manieris a vevin ancjemò la fuarce di condizionâ vitis sburtadis viers di un futûr diferent, sedi par aspetativis, sedi par pussibilitâts.

Un contâ comovent, ma mai nostalgjic, anzit, trement intal ricuart di compuartaments dai parincj segnâts dal principi di autoritât dal pari, che al cjacarave pôc e al comandave, tirant indaûr une zovine intun mont che vuê nus somee lontan no dome tal timp, ma ancje tal spazi, come se a fossin usancis e lengaçs di altre int.

Dut ce che al è stât, al ven contât de autore par cognossisi miôr, jê par prime, e par cirî di dâ esistence a ce che al larès pierdût, intun leam, impussibil di rompi, jenfri individualitât e coletivitât. In chest tornâ a pensâ il pari cui voi di frute e fantate, in chest “cuarp a cuarp” cu le vision interiorizade intal ricuart, e rive a meti adun preocupazions, motivazions, sintiments e valôrs che in chê volte inte contraposizion esistenziâl no podeve ricognossi. Al è l’efiet terapeutic de memorie mitude adun cun la scriture, che e dâ sens al sens.

Il passaç gjenerazionâl, il contrast jenfri pari e fi/fie, il mût diferent di viodi la vite, lis diferencis jenfri vite di campagne e di citât, la interpretazion e la comprension di un compuartament a seconde dal moment de vite: temis che o pensi che e podin stiçâ la vuestre creativitât. Bon lavôr a dutis/ducj!

Materie: Lenghe Foreste
Mês: Novembar
Prof. V. G.