CC26Novembar#01 – Muart di fam

#01 – Muart di fam

Al jere strac, strac tant che mai. Aromai a jerin doi dîs che si rimpinave sù pe nêf e lis pieris di chê maledete montagne, ta la criùre e la fam, cun almancul vincj oms armâts e cun tante voie di brusâlu, pacâlu e sfracaiâlu che i corevin daûr la cope.
E no dome nol rivave mai a fermâsi, a polsâ plui di un vincj minûts, ma al jere ancje chel ostie di lôf, simpri li, fer, a cjalâlu dal scûr da la gnot o dai arbui, in spiete di viodilu tirâ l’ultin flât. Al jere sec come un bacalà, ma al veve voi sflandorôs tant che spielis di cristal.
No i faseve pôre, anzit, cualchi volte al veve pensât di fermâsi par cirî di grampâlu e fâlu deventâ une bisteche. Però i mancjavin lis fuarcis e nol podeve nancje pierdi masse timp. Chest fintremai che alc intun zenoli no i colasse, lassantlu par tiere, a rifleti su dute la strade che i mancje, sui bruntulaments de panze e a la piel brusade dal frêt.
Il lôf si jere svicinât, intant, a mancul di cinc metris di distance, e si jere sentât a cjalâlu cui siei voglons. Al someave in spiete di une crochete. E lui al sarès stât la crochete, tant nol sarès mai rivât a viodi une altre albe.
Si poie il curtis cuintri de panze e al scomence a sbregâsi. Al pensave di jessi dûr come il corean, a fuarce di cjapâ dute chê glace. E invezit no, la sô piel e je cussì ingrispignide che la lame no à nissune dificoltât a taiâi la cjâr. Però nol sint nissun dolôr, e no i dà tant fastidi vierzisi la tripe cu lis mans, anzit, il calôr lu fâs sintî fintremai miôr. Nancje in saune si jere mai sintût cussì rilassât, e tirâsi vie i budiei i dà un sens di sodisfazion cussì grant che i somee di vê un orgasmi.
“Ven ca, ven ca.” I fâs un mot al lôf, che subite si fâs dongje, dut content e menant la code formentine. “No tu spietavis altri, sì?”
I slungje un budiel, che al ven cerçât cun plasê. Cjalant chel mustic sporc di sanc e bave, al pete une ridade e a si met ancje lui un toc di budiel in bocje. Muardintlu, al continue a riduçâ, ancje se un pâr di lagrimis glaçadis i van jù pal smursiel.

Materie: Siencis
di…
#1964