Tinto

Lu vevi dongje di me ai 27 di Avrîl dal 1997, a la jentrade dal cine d’essai “Ferroviario” di Udin. Lis proiezions de rassegne “Eurowestern” ta chê sere a jerin finidis. Ancje lui al veve provât ta chel gjenar, cun «Yankee».
Insome, o vevi doi mîts dongje di me: al jere ancje Franco Nero, jo o jeri restat li un moment, a stavin fevelant cun cualchidun. Forsit a vevin di decidi il puest dulà che a saressin lâts a cene. Jo non savevi propit ce disi a chei doi mîts. O jeri restât cidin.
O varès di fevelâ di un so film, come il biel “L’urlo” ma a la fin o sielç un di chei erotics, dai cuâi lui al è stât un soremestri.
E alore ve ca un sunt di “Così fan tutte” dal soremestri Giovanni Tinto Brass, comedie spirtose ispirade a Volfanc Amadeu Mozart cu la italo-romene Claudia Colacione, in art Koll. An 1992.
Al veve dai moments une vore ridicui. Brass al bute des freçadis cuintri de Glesie, de Comunitât Europeane e de poesie di autôr. Une siore madure che e fâs la putane dome pal so plasê e dîs a Diana (Koll) di vê un marît bec che “al combat cuintri de fam a Strasburc” e che se jê, zovine, e à voie, al sarès pussibil fâ ses cuntun vescul american une vore interessât a la robe. Diana e dîs di no.
A une fieste di inteletuâi siôrs une poetesse sexy e recite dai viers sporcacjons tra i batimans di ducj. A une altre fieste cun musiche tribal/house dulà che a balin parfin oms mieçs crots cui zoiei di famee ben in viste Diana e à une relazion sessuâl cuntun seminarist african che i dîs: “Cemût fasio a cognossi il pecjât se no voi tai puescj dulà che al è presint?”
Il film nol jere cui sa ce ma, o sai di disi peraulis gruessis pai spudesentencis/puriscj, al veve alc di Fellini… insome al jere a mieç tra Fellini e lis comediis erotichis cun Gloria Guida, cuntune ponte di velen.

di Checo Tam
#1847