CC26Otubar#30 – Vino veritas?

#30 – Vino veritas?

Nissun si visarà il gno non. O stoi par murî e dome chei di famee mi saludaran clamantmi Leo. Dut il rest dal mont mi à clamât simpri “switch” par vie che o soi nassût cuntun don: mediant di une iper ativitât neuronâl in tes areis di Broca e di Wernicke, o soi simpri stât bon, in pocjissim timp, di capî e fevelâ a la perfezion dutis lis lenghis dal mont. Dal cinês al swahili, dal rus a ce che a tabain i aborigjenos de Australie.
Ma la nature no ti regale dut e, di piçul, mi an diagnosticât ancje la sindrome di Tourette, dut cas in pratiche neutralizade cuntun chip implantât tal cerviel.
Sculeis fatis cence fastidis e rivât insomp: laureât “cum laude” in lenghis, indiriz relazions internazionâl.
O ai fat une cariere svelte e sflandorose fintremai rivant a jessi presint tai plui impuartants e decisîfs incuintris plurilaterâi a nivel mondiâl par risolvi tensions diplomatichis e conflits jenfri lis nazions.
Ancje se di agnorums lis tecnologjîs a permetin traduzions simultaneis, cuant che la singule peraule a pese, il “fatôr uman” al torne bon. E alore o jentri in zûc jo.
Almancul fin îr.
Daspò ve gjestît ce tancj meetings cun finecis dialetichis che nissune IA e varès savût fâ, îr tant che merecans, rus, cinês e indians di une bande e europeans, canadês, gjaponês e australians a scombatevin par sghindâ la tierce vuere mondiâl, jo o ai pierdût il control des mês peraulis.
Al è da preistorie indevant che la diplomazie si fonde su balis, alusions, bluffs e miezis veretâts.
Jo, îr, ìnvezit no ai podût fâ di mancul di dî a ducj lis veris intenzions di chei altris.
La veretât assolude su di ogni cuistion.
Di bant dî che ministris e ambassadôrs a an tacât a fâ bocjis e imprometisi vuere.
Arestât e condanât a muart! E cussì subit o sarai ricuardât te storie come chel che al à fat scomençâ il conflit che al puartarà ae estinzion de umanitât.
Cemût isal stât pussibil? Parcè no soio rivât a controlâmi?
O ai une uniche spiegazion: mi àn hackerât il chip.

Materie: Furlan
di …
#1963