CC26Otubar#28 – Minìn

#28 – Minin

La lûs che e rivave dal barcon le inceave. La schene, il cuel, il cjâf e lis gjambis i dulivin e i pareve che dutis chês curdelis e chei fîi, che a someavin di plastiche, le scjafoiassin… cun tante fadie e tirâ sù la man drete. No jere peade di nissune bande, ma no rivave di istès a tirâle sù avonde di parâ vie lis curdelis. Alore e provâ a tirâ sù la man çampe, e cun chê e rivâ fin a une curdele che i strenzeve il cuel e e capì che la curdele e zirave daûr dal cjâf e e rivave fin sot dal nâs. Intant, lis orelis i mandavin al çurviel un sun strani, come chel di une svearine, ma plui lizêr e regolâr. Si cjalâ ator, e jere distirade intun jet, cuvierte dome di un bleon. “Joi, dulà mai soio lade a finîle, cumò?” e pensà “… Signôr benedet, o ai di jessi in ospedâl… ma cemût? Ca devant o jeri te buteghe…”. Po, si impensà che e veve vût un inzirli une vore fuart, e veve sintût dute une vosarie tor di jê e po dopo… nuie…
Un dotorut zovin al jentrâ te stanzie.
– Signora, signora, come sta?
– O ai sêt, daitmi un got di aghe, par plasê – E rispuindè cun fature.
– Signora lei ha avuto un ictus.
– Ah, benon, fin cuant che si àn dincj in bocje, no si sa ce che al tocje.
Il miedi le cjalave e al someave preocupât.
– Signora, come si chiama? Sa dirmi il suo nome?
– Minin.
Il miedi al continuave a cjalâle, cence dî nuie. Po al disè:
– Signora, si ricorda che il suo nome è Domenica?
– Sì, Minin.
– Domani arriva sua figlia.
– Nol è mai un mâl che nol sedi ancje un ben.
Il miedi al taseve. Po, zirantsi viers l’infermîr:
– È confusa e disorientata e probabilmente non riprenderà più l’uso della parola.
E intant al scriveve:
Paziente confusa e disorientata. Eloquio incomprensibile e privo di senso. Non risponde a tono alle domande. Non ricorda o non è in grado di dire il proprio nome. Trasferire.
Tal dopomisdì, le puartarin intun altri repart.
A Minin i vignivin jù lis lagrimis dai voi.
Dopo un pôc che e cjalave fûr dal barcon e disè, planc, tra sé e sé: “Po ben, ce che al è al è, chi al tocje tacâ il mus dulà che al vûl il paron e ce che il Signôr al mande, bisugne cjapâ sù”.
In chel, al jentrà te stanzie un altri miedi, zovin ancje chel, che, tal rivâ, al sintì lis ultimis peraulis di Minin.
– Eh, lu diseve simpri ancje mê none… Alore, siore, cemût sino? Miôr mi pâr, no mo?
Minin e zirà il cjâf.
– Fi benedet! Mi capissistu?
– Sigûr! Parcè no varessio?
Al disè il miedi, cun muse di ridi.
– Eh, frut, di chê altre bande no mi capivin…
– Che mi scolti, siore, si visie il so non?
– Minin.
– Benon! Brave! Cumò o prepari lis cjartis par tacâ la riabilitazion. I àno za diti che doman e rive sô fie?
– Sì, frut, nol è mai un mâl che nol sedi ancje un ben.
– Ah, mi pâr di capî che al è di un pôc che no si viodês, vere?
E intant al tacà a scrivi: Paziente lucida. Si esprime bene e con proprietà. Ricorda il proprio nome. Cominciare riabilitazione. N.B. PARLA FRIULANO.

Materie: Il cjâf dai furlans
di …
#1961