CC26Otubar#26 – Un regâl

#26 – Un regâl

Ce plasevul e ce dispietât che al è il mont. Ti pues fâ crodi che tu sês tal paradîs e dopo butâti jù tal infier plui infogât. I pues sucedi sedi a un grant, sedi a une frute come me, a cui che il mont i cambie ator cence podêlu controlâ. La vite mi à puartât par une strade che no varès mai pensât. O ai vût di cjaminâ par trois scûrs, cussì scûrs che no podevi viodi dulà che o metevi i pîts e no rivavi a viodi nissune lûs che mi disès che di cualchi bande al jere un puest sigûr. Ancje se chei ator di me a fasevin il pussibil par judâmi a son robis che dome il timp al pues curâ, ancje se no simpri si à la sigurece che lu fasi. Cuant che al è di tant timp che tu spietis ma nol sucêt nuie la frustrazion e il dolôr a cressin dentri di te e tu stes tu pierdis la sperance.

Cussì mi sintivi cuant che tu sês rivade, ma dopo di vêti cognossude dut al è cambiât. O podarès stâ cent dîs e cent gnots a contâ dutis lis voltis che tu sês stade dongje di me cuant che il mont mi someave il puest plui crût che al podès esisti. Ma tu cu lis tôs ridadis e i tiei scherçs tu âs trasformât i miei dîs monotons in alc di divertent di volê ricuardâ. Cumò o soi vuaride ma o sai che cence di te no o sarès rivade a fâlu. Di timp lis nestris stradis si son separadis, ma come che ti vevi dite o ai voie di fâti un regâl. Al è di tant che o cîr di finîlu, ma il timp mi sbrisse jenfri i dêts e i dîs a van passant. Chel che o vuei fâti nol è un regâl costôs, ma al à tant valôr. E je une piçule sculture di len dal to animâl preferît, il mus. Al è un mus distirât in maniere cuiete che al gjolt des piçulis robis che al à ator cence pensâ che no valin nuie. E ancje se al è li che al polse al à il cjâf che al cjale insù viers il futûr, un futûr plen di dons e dolôrs e che cu la tô stesse determinazion al è decidût a frontâ e a lâ indevant. O vuei fâti chest regâl par dîti graciis, parcè che par me tu sês stade il rai di lûs che al à traviersât i nui grîs, tu par me tu sês stade il plui biel regâl.

Materie: Art
di …
#1959