CC26Otubar#24 – Il cjâf dai Furlans

#24 – Il cjâf dai Furlans

No sai ben cuant che al è tacât dut. Mi impensi che di frut o lavi ben a scuele. Mi plaseve zuiâ cui miei compagns, fevelâ cu lis mestris, stâ cu la int. O jerin a stâ cui parincj tun vecjo cjasâl, a Pieris, e o passavi lis zornadis a cori daûr dai sborfs tra i claps dal Lusinç. Po dopo, une sere gno pari nus à dit che al veve vude une promozion e che o vevin di lâ vie di cjase. Jo no rivavi a capî parcè che lu mandavin lontan se si jere compuartât ben. Forsit jessi promovûts e jere une freadure. La mame però e jere plene di morbin, parcè che a paiavin une fortune e nus varessin dât un aparament dut par nô, ancje dongje, propit come i siôrs!  O sin rivâts sù a Comelians che al neveave a bleon e o batevin i dincj di frêt. Jo o cjalavi dut chel blanc che mi travanave i voi, ma cuant che o ai slungjade la man par cjoli un floc o soi sbrissât e dut al è deventât colôr pantan. Lis stanziis che nus vevin prometût a jerin tun casermon di piere masse grant e vueit par podê jessi scjaldât de vecje stue tun cjanton. I fruts a zigavin peraulis che no capivi e mi paravin vie come une moscje se o provavi a fevelâ cun lôr. I oms che a lavoravin cul pai a jerin simpri rabiôs e lu cjalavin di sot coç. Ancje l’entusiasim de mame si è sdrumât cuant che e à scuvierzût che in paîs no jere nancje une buteghe. A mi dutcâs no mi displaseve la mont. Dopo però e je tacade la scuele. Il mestri mi cjoleve vie pal non. Mathias Fùrlan. Al diseve che gno pari al jere un masse passût a vergognâsi di jessi un Furlàn. Dopo a son rivadis lis batudis sui triestins. E plui o cirivi di spiegâ che o jeri bisiac e plui mi cjapavin pal cûl. Mat Furlan. Po o soi deventât il Mat Fûr Land. Fûr di puest. Fûr dai lôr zîrs. Ancje i miei a àn patît tant. A son cuasi muarts di sclopecûr. E cumò, dopo ducj chescj agns, ancje se o sai il furlan miôr dai lôr canais, che a cjacarin ducj tal talian di Milan, mi ridin ancjemò daûr.
Che mi disi, dotôr, soio jo il fastidi o isal il cjâf dai Furlans?

Materie: Furlan
di …
#1956