CC26Otubar#23 – Smicje

#23 – Smicje

Cuant che o lavi ae scuele salesiane di piçul, e jere tacade une buteghe religjose cun dai libris, tantis statuutis e altris imagjins.
Te vetrine e jere une che a mi cjapave i voi. Cuant che tu i passavis devant, ti cuintricambiave la voglade, no cate si tu vevis o no un sens di colpe par alc che si tu vessis fat mâl o no. Tant che frutin, no ti acuarzevis che e funzionave tant che propit un confessionari imagjinari, che ti faseve domandis cence vôs, ti tabaiave e si scugnive di cjalâsi dentri par rispuindilis.
Te vite, a son altris imagjins che tu ti cjatis vie pai agns, ancje chês che ti interpelin fûr dai dubis dal spirt o la religjon.
Une di chês imagjins e je la sculture dal mus te place di Feagne dulà che si fâs la gare la prime domenie di Setembar ogni an sin dal 1891. De posture dal animâl, ti rive la domande si la bestie e je inrabiade cun te che tu le cjalis di daûr. O se al è daûr a mostrâsi cul ipotetic paron, eroic e vivarôs.
O crôt che la bestie e prepare simpri un sclop par chel che le cjale di daûr no cate cemût al sedi plaçât.
La statue e à un bus tal posteriôr, -sì, dulà propit che tu pensis-, che ti smicje, ti sbare par sclopâti cjapanti di scuindon cuant no tu ti visis. Alore tant che chê de buteghe religjose di mê infanzie, che simpri ti torne la voglade, dome che in cheste volte no soi i siei voi che ti inmaghin, ma di sigûr tu crodis di sedi cjapât cheste volte pal cûl.

Materie: Art
di …
#1956