CC26Otubar#22 – Maremagnum

#22 – Maremagnum

Mi svei a buinore ducj i dîs. La ore juste e je aes 7.20 cuant che i arlêfs di une scuele dongje cjase mê a scomencin a jentrâ.
Cheste situazion e merete une spiegazion.
Mi somee che i gjenitôrs modernis a crodin di sei gjenitôrs miôr se a lassin i lôr fiis propri dentri de scuele cu la machine. Cussì che si formin dôs e trê riis denant dal edifici, il trafic si ferme e i clacsons a tachin a sunâ. Chest casin al jemple l´aiar, e jo che o soi a stâ a 200 metris… mi svei!!!
No mi covente un orloi! Chest al ven rimplaçât di chel fracás.
Mi svei, mi senti tal jet, o saludi il Creadôr e o scomençi a pensâ a lis robis che mi spietin vuê; no pensi a tant a chês di fâ ducj i dîs, o soi disperât di savê ce grandis sorpresis la Vite e à par me.
La Vite e je tant che un incredibil “maremagnum” dulâ che a son dutis lis pussibilis azions dai oms, ducj i miei amîs e chei che o podarès vê, dute la musiche che o suni e chê che o podarès sunâ, ducj i desideris, ligriis, dolôrs, il lûc dulâ che o soi e chei che o podarès cognossi, la storie che o stoi biel scrivint e chês che a son a spietâmi, la int che e je ator ator e chê che mi contornarà….
Intant che o voi a preparâ il café o cjali il gno zardin, mi regale une imagjin une vore biele; cheste e je une piçule… piçulissime part di dut ce che la nature e ufrìs a chei che a son simpri daûr a a cirî bielece.
La Vite e je un “maremagnum”, une rêt di infinidis pussibilitâts, plene di stimui e sfidis, e jo o stoi a spietâju.
Di colp, une vôs di dentri mi berle: tu tu sês tarde par lâ dal miedi, e tu âs ancje pierdût il tren… la pivete dal tren e va sunant ogni volte plui lontan.
Bon, mi dîs a me stes, o ai di pensâ cemût si pues rivâ li dal miedi intun altri mût.
Saressie cheste fufigne une prime sfide dal dì? Lis spieti plui dificilis.
Mi sint benon, o soi biel navigant ta lis aghis eternis di chest mâr vast. O soi dome un navigadôr intun cuarp limitât, che al dûre par un timp limitât. O soi un fiât di infinît. O ai un inizi e une fin scognossodis e fin che no rive… o vîf!
Mi svei, mi senti tal jet, o saludi il Creadôr… o spieti segnâi… o Vîf!

Materie: Matematiche
di …
#1955