CC26Otubar#08 – Il tesaur (Nummulites)

#08 – Il tesaur (Nummulites)

O vierç une altre volte la cjartine gjeografiche des mês culinis. Je aromai fruiade. Voi e dêts a van scrutinant simpri stradis, nons, isoipsis e colôrs.
Vuê la buere e zonte un revoc dal nono: Brda… Cuel, Culine. Nono Gjelmo al jere dal ‘13, nassût sul cuç di San Florian dongje Gurize. “La prime bombe le ai sintude a doi agns” mi contave. Tornant di scuele, metût pît fûr de coriere, mi spietave il bati argjentin e metodic sul fier dal sô falcet. Al bateve de Anunziade fin a San Zuan. Açâl che al devente fîl, rasôr… che no si sa mai… A buinore, dopo il cafè di vuardi, a partivin lui e Sveto, il so cjaval, peât tun biroç, sù pes dolcis crestis. Ogni tant mi puartave cun sè e lu sintivi fevelai in slâf: Gremo… nin dilunc… Ustorite tukoj… fermiti culì.
Smontât, la sô lame, bisturi stralusint, e pleave di une bande la cjavelade des jerbis, inmò umidis di rosade, par puartalis aes sôs besteutis di cjase. A une ore però, si fermave, su un spiç di chê spine dorsâl di cuei che e mene scuasit al mâr, e tirât fûr un spagnolet, al zirave i voi ator ator.
“Nono” i domandai “ce viodistu di ca sù tu e Sveto”.
“O cjalìn il tesaur di cheste tiere, e il mâl che je stât fat tirant sù i reticolâts.”
“Ah, dîstu des vignis, o di chei dilâ dai cuei, i triscj”.
“Fantacin, jo o feveli cuatri lenghis, slâf, furlan, talian e un pôc di todesc, ce ti parie? Tu tropis sâstu? Il teritori al va vivût e no dome dividût, viodût o bevût. Par cont dal tesaur, nol è il vin che al fâs la tiere, ancje se al puarte benstâ. Il tesaur al è sot tiere di mil e mil agns che le lavore e le colte. Di zovin, disolçant cun Sveto cheste tiere morbide e grasse, colôr di nole, mi impantanai i çucui di chês monedis di tiere. Content, a cjase lis lavai sot de fontane. No brilavin. Pre Gjidio, dopo messe, mi spiegà che ju clamin i beçuts, e a son la vite antighe di chestis culinis, Nummulites, pai gjeolics, vite di fondâl, dal mâr vecjo chi insedât de creazion, che i dan colôr e savôr al teritori. Âstu capît fantat, parcè che mi cjali ator? La tiere e da la vite, la pâs a creve i confin, il rispiet al lee i popui, e la lenghe si impare, po ancje il vin al puarte ligrie… ma chel bon! O vin un teritori maraveôs no stait a vendilu par doi beçuts… di cjarte!”

Materie: Gjeografie
di…
#1941