Contecurte la Vôs de Basse

O vin gust di contâus alc dal Premi Leterari che nus plâs di plui, che come che bielzà o podês imagjinâ al è nuiemalcul che Vôs de Basse, stant che al è un concors par… CONTIS CURTIS! E insome… se no si butìn a scrivi contis curtis noaltris di Contecurte, cui aial di fâlu?

In sumis, sabide di sere, tor cinc e mieze – sîs, e je stade la premiazion dal concors, e o vin vudis un biel pocjis di sodisfazions, e no tant par il fat di jessi peadis ai premis o mancul, ma par il fat di cjatâsi ducj insiemi e di podê fâ une biele fotografie come che ca parsore. O pensìn che vê metût adun un biel progjet, fat di peraulis tal web, ma fat ancje di personis e di int che e à gust di fâ robis, al sedi il vêr sucès di Contecurte, e nus pâr just condividîlu cun voaltris contant alc dal Premi.

Alore, come che o savês, ancje se je e disarà di no, a fâ buine part dal  lavôr organizatîf di chest concors e je la nestre Coghe Serena Fogolini, che e à puartât indevant cul solit snait la premiazions, ancje se il nestri Eduart Baschera al à pensât ben di mancjâ la jessude de autostrade (ma simpri colpe di Serena, al à cirût di sghindâle chel smafar) e fâsi spietâ un biel pôc par ritirâ il premi de sô femine, Noemi Salva, che e à vinçût la categorie traduzion, voltant la poesie sul amôr di Borges, sô grant amôr leterari e cetant innomenât autôr (di contis curtis!) argjentin.

E in argjentine al è lât a finîle ancje un altri premi pe poesie, nuiemancul che a Lenart Gjavedon, che al è lât sul podi in cheste categorie, tocjant un argoment dal dî di vuê tant che la costruzion de gnove fabriche di açâl a San Zorz, intune categorie dut câs vinçude di Egle Taverna, altre nestre cognossince.

E te sezion contis, nestri cjamp di aplicazion, o vin vût il tierç puest a pari merit di Famei e Sartore, Checo Tam e Astrid Virili, cu lis lôr contis (cjase dai vons e Il patriarcje), e il prin puest dal nestri Ostîr, Rafaêl Serafin, cu La gjave di Pampalune. E ae premiazion si sin cjatâts ancje cun Laurin Zuan Nardin, e ve chi che o podês lei la sô conte, e cun Zuanluche, il nestri Mestri. Insome… la clape di Contecurte, chest colp, e je stade propite la Vôs de Basse e dal furlan leterari.

E se o vês partecipât cuntune conte al concors e volês che e vegni metude su la osterie… mandaitnusale!

Uniche note negative, la mancjade assegnazion dal premi pes categoriis dai fruts, che ancjemò no rivin a produzi un furlan che si puedi clamâ tâl, cun dut dai contignûts di fantasie e valôr. Une tirade di orelis de zurie che no je dal sigûr une biele gnove, ma che e pues jessi però une maniere di meti adun cualchi soluzion… e a chest proposit, la nestre Osterie, e sta masanant une gnove iniziative… Intant tigneisi libars par il 29 di Dicembar… meteit in vuaite i fruts e stait in spiete di gnovis!