San Denêl, ai 7 di Lui dal 2022
Biblioteche Guarneriane
Dopo il sucès di Cjopris, o sin rivâts a meti pît nuiemancul che in Biblioteche Guarneriane, a San Denêl, e insome… nus pâr un biel travuart, vûstu pal puest cetant innomenât, vûstu parcè che di chestis bandis, la nestre Ostarie, no jere mai capitade.
E la ploie che e à dât une biele remenade (di gracie!) cualchi ore prin dal event ae fin nus à zovât, stant che cussì o vin metût adun la robe tal sierât, intune des stanziis de part moderne che e someave fate di pueste par il nestri spetacul.
E cussì, ancje chi, si è cjatade la Ostarie al complet, e la trasmission, presentade di RAPHAËL SERAPHIN, svelt come un tren, e gjestide ae part tecniche de esperte dal Dark Web ASTRID WIRILGREN, e je lade vie par une ore e mieze cence nancje inacuarzisi che e jere passade.
Le à vierzude l’atôr fenomenâl FRANÇOIS TAMÌ, cul so furlan perfet, par jessi un francês, che al è cetant brâf di fâ sclopâ no une, ma adiriture dôs lampadinis de lûs par lei… e clare, simpri sul moment plui biel.
Ma intant che l’Ostîr, cun mistîr, al contave la storie des Lusignis (la prime conte di Cryptofriûl, par capîsi) ve che a jentravin tal discors la gjornaliste e storiche MARGRETH COGOVIÇ, drete di soreli jevât, e la etoliche e zooliche SERENE VÖGELIN che e à studiât il furlan tal zîr di dîs minûts e e faseve un switch lenghistic che al jere un spetacul za lui di bessôl.
E inte serade, tal moment plui delicât, al salte fûr che tal public no isal BERTO AGNULE, ancje lui innomenât Cryptozoolic che al zire intal web. Berto al à puartât ae atenzion dal public i siei video che – nus à dit – a mostravin nuiemancul des imagjins dal Cjan des Lusignis, dermotar estint bielzà di desenis di agns. Ben… no je lade propite cussì.
Ma la serade e je lade indevant par fortune, e dopo vê parât vie congjedât il siôr Berto o sin rivâta adore a puartâle cjase.
La storie di Bepi Govetose, di Davide Cislaghi, di Gnese e Chele e à inmagât il public, cussì come la motoruede e il cjan des lusignis. Insome… O vin vût parfin il gust di vê i Doi Piçui Aiutants di Contecurte, che cul lôr judizi simpri une vore sevêr nus àn confermât che chest al è stât un spetacul une vore ben jessût, e come che al diseve il Cramâr de Ostarie, il miôr che o vedin mai fat. E noaltris i crodìn, e o sperin propit di meti adun ancje une seconde puntade! Cuissà…
Intant o metin cheste serade jenfri lis miôr che o vin inmaneadis, ancje in gracie de poie di Ivano Contardo, di Appunti Sonori, e de clape super eficiente de biblioteche Guarneriane.
- Cronache dal event
- Articul di presentazion de serade
- Presentazion dal libri sul sît di Gelo Stellato
- Dulà cjatâ il libri Cryptofriûl
