Un Viaç di San Denêl al Cryptofriûl

E intant che o pensais a cuale conte votâ, nô us contìn cemût che e je lade a San Denêl… o sin partîts ancje de Biblioteche europeane plui antighe, ven a stâi de Guarneriane, par lâ in viaç tal Cryptofriûl!

E ve chi un pocje di croniche e di fotografiis de serade, juste par contâ alc dal event a cui che nol jere.

Tant par scomençâ, uns trê oris prin dal spetacul, al à pensât ben di sglavinâ. Un di chei temporâi che a passin intun moment, ma come che a disin i furlans, nol è mai un mâl che nol sedi un ben, e cussì, ve che invezit di fâ la serade tal viert, intal zardinut de biblioteche, il super staff guarnerian nus à prontât une des salis che e jere perfete par ce che nus coventave di fâ.

Vie i libris e subit imbastît un studi televisîf: trê poltronis pai ospits, une postazion ai comants informatics e il spazi pal presentadôr. Cui jerie cheste int?

Di sigure un entertainer di gale come Raphael Seraphin, che al à tignût bot cu la sô lengate par une ore e mieze di spetacul cence fa sierâ nancje un voli al public, pôc ma avonde par jemplâ la sale. De France al è rivât nuiemancul che l’atôr – e grant letôr – François Tami, che al à inmagât cu lis sôs leturis; dal Est o vin tirade dongje une grande storiche e gjornaliste, esperte di furlanitât, ven a stâi Margreth Cogoviç. E in fin, drete des Gjermaniis, Serene Vögelin, etoliche e zooliche innomenade, pronte a disvelânus i segrets dal cjan des lusignis (e l’umlaut su la “o” no lu metìn che o sin sflacjons).

E propite Lusignis e jere la conte che o vin metude dongje, par contâ la storie di Giuseppe Govetosa e de sô Motoruota. Ma plui di chi no us disin, par lassâ un pocje di sorprese a chei che a vignaràn a viodi altris spetacui come cheste trasmission, che e somee propite plasude a ducj.

In efiets, framieç dai videos e des imagjins pandudis de nestre esperte dal dark web Astrid Wirilgren o vin vût un inspietât intervent di Berto Agnule, innomenât cryptozoolic che al jere sentât tal public e si è palesât par mostrânus i siei videos cu lis indagjins sul cjan des lusignis, aromai estint, pe nestre Serene, ma par lui ancjemò esistent intes nestris tieris. E come se nol bastas o vin vût tal public ancje la partecipazion dai Piçui Aiutants di Contecurte Ricart e Jacum!

Avonde cussì… no disvelin altri di cheste trasmission televisive cun chest formât che al met dongje leterature e sagjistiche (ma ancje musiche poesie imagjins e vie indenant…). Il libri, se o vês voie, savês dulà cjatâlu, e cuissà mai che no nus domandin di fâ un altri spetacul, magari suntune seconde puntade.

1 coments On Un Viaç di San Denêl al Cryptofriûl

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît