San Simon in Cort

Udin ai 5 di Lui dal 2021

Li de sede de Societât Filologjiche Furlane, in vie Manin, e je une cort interne une vore sierade, che e slontane dai rumôrs de citât. Propit li o vin vierzût i events di chest 2021 cuntune presentazion dal libri Bisest, dal 2019, vincidôr dal San Simon di chel an. Stant che la prime presentazion e jere programade par il 29 di Fevrâr dal 2020, ma che propite ta chê sere a son partît i diviêts e lis sieriduris, al è stât come sierâ un cercli podê presentâ il libri, ancje se in struc, propite intal stes puest dulà che e jere proviodude la prime presentazion. E si sin cjatâts cuasi ducj, noaltris de Ostarie, stant che intant che l’Ostîr al rispuindeve (a câs) al puar Walter Tomada, brâf come simpri; la Coghe e il Famei si son ocupâts des leturis, puartant la int che e jere (comprendude la Sartorie, il Cramâr, la Massarie, il Berlon…) drets intal 2084, an di ambientazion dal libri.

Al è stât une vore interessant intivâ che tancj dai temis tratâts in Bisest si son disvilupâts cu la pandemie, che e somee vê svicinât lis pôris dal mont e lis sôs bruturis. Po dopo si sa, il libri al da ancje la soluzion, in bande dai problemis, ancje se no simpri a son “politically correct”. E in efiets, al è bastât sintî la preiere ledrose lete di Checo o la cjantrapoesie dal Ostîr, cun la Bibliocheche Nene ai drums, par vê un cerce di chest libri scalembri, ma inmò une vore atuâl.
Seradone, insome, che si pues ancje cjatâ su FB, intune lungje direte dal event.

Riferiments

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît