Listize, ai 9 di Avrîl dal 2022
Biblioteche Comunâl – Vile Bellavitis
La prime presentazion dal libri che al à vinçût il Premi San Simon 2021 il nestri Ostîr le à fate nuiemancul che tal so comun, Listize, doprant la serade no dome par presentâ il libri, ma par meti adun une presentazion dal autôr. Sì che, cul jutori di presentadôr di gale come Stefano Pandolfo e la poie dal Comun, rapresentât inte jentrade di Gjeremie Gomboso, la interviste a Rafaêl e je vignude fûr zuarine e vivarose.
Tant par lâ a risi di cjapâlis, l’Ostîr, matucel come che o savìn che al è, al à vude la pensade di sentâsi tal public e fâ fente di no jessi presint (mascarute e scjavelade a torzeon i garantivin un bon grât di anonimât) lassant meti la muse al so fidât famei, Checo Tam. No cate berlâi e fâ il fastidiôs dal public, fintremai a jevâsi sù e lâ sù a dîsi di dut cuant che il famei al à pandût a ducj che Serafin nol à scrit nissun dai siei libri ma al à un “ghost writer” che jai scrîf ducj.
Benon, insome!
La serade, cun dut di chest, e à viodût la presince ancje di chei altris de Ostarie (la Coghe, la Sartore e la Massarie), a lei no dome lis storiis di Cryptofriûl, ma ancje cualchi sbrendul di Bisest e a visâsi di Contis di Famee, dut cul jutori des imagjins sielzudis de Sartore. E amen se cualchi probleme tecnic al è saltât fûr. Dut ca? Ma ce! A jerin presincj ancje un grop di frutats e frutatis de scuele di musiche di Gnespolêt, a meti dongje cualchi biel intervent musicâl.
Insome… un biele vierzidure, par chest libri e in gjenerâl par il nestri Ostîr, che cuant che si compagne cun chei de Ostarie al à simpri il just snait.
Riferiments
- Articul di presentazion su Contecurte
- Presentazion dal libri sul sît di Gelo Stellato
- Dulà cjatâ il libri Cryptofriûl
