In viaç tal Cryptofriûl di Viscon

E insome… o rompìn par un marilamp la onde des contis de Corse Curte, che che in chescj ultins doi dîs di Avost a rive ae fin, par contâus un pôc cemût che e je lade joibe stade in chel di Viscon.

Tant par scomençâ us metìn une biele fotografie che par une volte si sin visâts di fâ… ven a stâi, in gracie de fotografe gjatemarangule, une foto a fin spetacul ducj insiemi.

Ma viodìn di contâus ce che al è sucedût prin…

E nie, location perfete, tant par scomençâ, se no che la Sartore si je smenteade un cavo ma o vin cumbinât, il Berlon nol cjatave une clavute usb e al à doprât un clap, l’Ostîr si è vistût come un pipin ma al veve pôr che un gjat i pissàs tes scarpis lassadis daûr dal tendon, ma ae fin… un super spetacul!

O sin lâts fintremai di Viscon a Sauris, cui nestris ospits aromai bielzà ben cognossûts: l’atôr Francoise Tamì, la gjornaliste e storiche Marghreth Cogoviç, la Zooliche Serene Vogelin e la esperte di Deep Web Astrid Virilgren… Ducj in forme e metûts adun dal presentadôr de trasmission, Raphael Seraphin, a àn contade une storie di riviel e di vueris, di magnis e di amôr, di dubis e sinceritât, di more e balon, di salvans e di tiere di salvâ e vitorie cence violence.

Une storie di popul che forsit no ducj a san, robade al libri dal Ostîr, Cryptofriûl, ma mudade in trasmission televisive. E cun di plui, clou de serade, la presince intal public di une star internazionâl, il american Mike Berlon, che al è di divignince furlane e al jere chi in patrie par studiâ e dimostrâ la esistence de magne di mont, nemâl beromai discomparît di un pâr di secui ma che lui al dîs di vê cjatât in tai boscs de Cjargne.

E tal public, plui di cualchidun al veve benzâ let il libri e o vin cucât ancje cualchi contecurtâr, come Laurin, e cualchi om de Panarie… Sì che… une seradone, in gracie soredut dal Comun di Cjopris Viscon che daspò di vê viodude la prime puntade dal Viaç tal Cryptofriûl al à volût viodi ancje la seconde (cun la complicitât di Sandri Pian, che al è deventât adiriture Tecnico Luci). E cui sino noaltris par no contentâju. La int, ae fin, nus è parude dute contente, e nô altris de ostarie o vin une altre serade pronte par lâ in viaç intal Cryptofriûl… Al baste domandâ!

Ve chi cualchi fotografie de serade, par fâus vignî gole!

1 comment