Letare vierte a Checo e…

Imagjine, Checo, di fâti fûr dal barcon dai miei ricuarts intal forest. O vevi il mâr propit di là de strade denant de puarte di cjase. Siet di matine e daspò di un burlaç su la strade a jerin restadis un pâr di pocis. I rais dal soreli si poiavin jefri i cjavei sgardufâts di une frute piçule (a voli e varà vût uns trê o cuatri agns) scrufuiade su une di chês, cun lis manutis tignudis a cop, si lavave la musute. Sì, la aghe e jere un ben une vore preziôs e intes cjasis, cuant che rivave, chê pocje e jere rosse di savalon e no ‘nd jerin motôrs par pompâle sui plans. La gnot o sumiavi la musiche des nestris fontanis, in Friûl, o speravi che mi puartàs il sium par frontâ ancjemò une altre zornade…
Il vinars, là, al jere la nestre domenie in Friûl e dispès si sintive un casin di pivets che a passavin pe vie e daspò di cualchi minût la pivetade e tornave a fâ un altri zîr e cussì ancjemò no sai cetantis voltis. O domandai a lis frutis, fiis dal paron di cjase, ce che al sucedeve, e lôr mi contarin che pai matrimonis i invidâts a cjapavin a nauli un taxi (lis machinis a jerin une vore pociis) e… plui taxis a ‘nd jerin e plui siors si fasevin viodi i nuviçs. Facil par me pensâmi des cjampanis di Cjarlins che cun gjonde a contavin al nestri paîs e a chêi dulintôr de biele fieste par i doi nuvics…
Une volte a si faserin viodi la mari e la none des frutis, lis fiis dal paron di cjase, e a jerin parecjadis tanche un altâr votîf: ator dal cuel a vevin dut l’aur, lis medaiis “Louis XIV”, lis perlis e cedaldiaul di lusint che al fos propit par lâ a un matrimoni e fâ viodi ai parincj cetant sioris che a jerin. Lis frutis mi contarin che la lôr cusine, la nuvice, no veve mai viodût il so om, parcè che so pari e il pari dal nuvic si vevin metûts dacuardi par i beçs e par il tratament di gnocis. Mi contarin ancje che lôr, lis fiis, si sintivin fortunadis parçè che il lôr pari i veve dât la sô peraule che lis varès lassadis libaris di maridâsi cun cui che volevin lôr.
In Avost, biel cialt duncje, dute la citât e jere in fieste, cun balis coloradis picjadis dilunc lis viis, nancje che al fos Nadâl, e musiche arabe a sbreghe, mandade fûr des cassis dapardut. E jere la fieste de Id al-adha, ae fin dal Ramadan, e si ricuardave il sacrifici di Abram e so fi Isac cun fiestis e mangjative di lus in dutis lis fameis: il Guvier al regalave a lis fameis plui puaris (chês che no podevin comprâssal) un monton che al viveve cu la famee par uns trê dìs e daspò al vignive sacrificât cu lis regulis de lôr religjon e di lui a vevin di mangjât dut, nuie al veve di jessi straçât…
Lis frutis mi puartarin un biel plat di couscous cun la cjar dal monton e jo lu ai mangjât vulintîr parçè lis frutis e la lôr famee nus volevin ben e nus regalavin une part dal lôr cûr condividint il segn de fieste par ducj lôr une vore impuartante.
Piçui slambris di vite, Checo, mai puarti dentri cun dolcece parcé che di forescj o ‘nd ai vût rispiet e afiet… Però o ai cognossût ancje la vere anime di altris no forescj e la rise des feridis intal gno cûr e sangane cualchi volte.
Ae fin o sai di jessi stade furtunade per vê incuintrât in moments dramatics bielis animis che mi ‘nd àn regalât emozions e sintiments che nissun cont in bancje al podarà mai dâmi…

di Barbara Battel
#780

5 comments