CC26Novembar#02 – La bestie

CC26Novembar#02 – La bestie

La facende e je grivie! No si po lâ indevant cussì, cun chê besteate che e zire tra lis Alps!
A Verzegnis e à fat stragjo di pioris tal tamar di Toni Rosean. A Lauc a son stâts copâts trê mus di proprietât de famee Moro. E plui in sù, intune fatorie, la bestie e je stade a cjace di gjalinis e poleçs: a ‘nd à fats fûr almancul trente.
Seont plui di cualchidun si tratarès di un grant lôf. A mi mi ven iniment la liende di une bestie grande che tant stragjo e fasè in France tal 1700 e cjapilu. Mi soi cautelât ancje jo cun trapulis e centis, stant che i ten a lis mês vacjutis di lat svuizaris.
Il sindic al à mandât ator dai cjaçadôrs cun licence di copâ chel lôf. No ju clamin cjaçadôrs ma “bioregolatori”. Purtrop o vin vût ancje la presince dai “animalisti” che a son vignûts ca sù a protestâ. No san nie dai nestris problemis. A vegnin de plane e de citât. Cualchidun al dîs che o podaressin ancje lassâ cori se a vegnin scorsâts i nestris arments. Alc il stât nus rifont, e je vere, ma imagjinaitsi se la bestie e atache un om o se e fâs di un frutin un sôl bocon! Par chel jo i animalisti no ju sopuarti. A varessin di cjatâsi propit un lôf devant e mi imagjini ce che e fasaressin. A varan une tecniche par no fâsi muardi. “Il lupo non attacca l’uomo”, “sono cent’anni dall’ultima volta che un lupo ha morso un uomo” e altris monadis dal gjenar. No, no, jo no mi fâs freâ e no darai in past a la bestie lis mês bielis vacjutis, la Adue e la Rome. Sì, ur met i stes nons che i dave gno nono bis.
Usgnot o stoi in vuaite. No ai pôre! O fronti il nemì.

O ai sintût cumò cumò un rumôr sospiet difûr, bande dai miei cjôts, li che o ai ancje altris besteutis.
O voi fûr cul gno dopli.
Gnot frede di novembar cu la lune plene.

Ma ce sucedial?
Usti! Mi son cressudis lis ongulis te man çampe! In pôcs istants! E il gno braç al è plen di pêl! Nol jere cussì prime!
Adiudiudiu, ce dal diaul aio intor?

Auuuuuuuuuuuuuuuuuuuuuuuuuuu!

Materie: Siencis
di ..
#1965