CC26Otubar#29 – Presincis tal Cuei

#29 – Presincis tal Cuei

Ce isal di plui biel des culinis dal Cuei, cuant che la Sierade lis impie intun sflamiâ di colôrs? E propit li o ai puartade Siglinde, la valchirie di Bozen che o ai cognossude al concierton di Suns Europe, par un fin setemane romantic.
Al amont dal soreli o cjali i cjavei bionts indorâts dai rais sflandorôs, e o bussi chei lavris dolçs tant che raps di Ramandul… ce felicitât!
Biel che o cjaminin pai vignâi si alce un vêl di fumate, che e cres simpri plui e nus cercene intun cercli magjic, tant che se e fos la cjavelade di une strie vielonone.
Ma a un ciert pont, di colp lis culinis a tasin, il ros e il zâl des fueis a deventin grîs, il sunsûr dal aiar fra i arbui si stramude intun lament: l’incjant di prime al lasse il puest a une atmosfere signestre…
O fermi Siglinde; sintie ancje jê chel rumôr, come un svoletâ e un talpetâ strissinât? I siei voi spalancâts pe pôre mi fasin capî di sì, ma cun chê fumate penze no si viôt a un pas.
I arbui a son masse lontans par rivâ a platâsi là jù, cussì i dîs di dividisi, par vê plui pussibilitât di salvâsi.

O cor vie cence fermâmi, ma la presince e rive simpri plui dongje, fin che mi inçopedi e o finìs par tiere distirât… Ma ve che devant di me e je di gnûf Siglinde!
Cemût ise rivade li? Ma parcè cumò aie i cjavei blancs? O sint la sô man che e vûl judâmi a tirâmi sù: e je frede tant che il glaçâr de mont Cjanine!
Siglinde, ma ce sucedial? Parcè âstu i cjavei blancs? E parcè i tiei dincj sono luncs e spiçâts?
“Küss mich…” Bussimi, mi cisiche intune orele, e jo no capìs plui nuie, i miei lavris a van dongje de sô bocje, simpri plui dongje …e zanf! O sint i dincj di Siglinde tal cuel!

Scaturît o capìs che chê presince e sarà la mê fin. Siglinde mi supe di gust il sanc des venis, e cun chel lis fuarcis che mi tegnin in vite.
O volarès fâ la batude: Ninine, no stâ a muardimi sul Cuei! ma Siglinde no capìs il furlan… e dut câs mi ven inzirli e o coli in svaniment, o rivi dome a pensâ: e je la fin.

Materie: Gjeografie
di …
#1962