CC26Otubar#27 – E cheste e je la storie

#26 – E cheste e je la storie

Il cjâf dai furlans isal speciâl? Franc Fari al dîs di sì.
Se tu domandis a un furlan: “Il to cjâf isal speciâl?” lui al alçarà il so cjâf par cjalâti e, cuntune voglade stuarte, ti disarà: “Ca l’unic speciâl tu sês tu che tu fasis chestis domandis”.
Lu dîs par esperience. Tal 2007 o ai partecipât a une ricercje academiche pe Universitât, par capî se e fos une corispondence tra la teorie di Fari e la realtât dai fats, chê empiriche, chê concrete. E par chest o lavi ator pal Friûl, cu la mê machinute, rimpinantmi pes monts, pes culinis, passant tra pôi e cjamps in planure… par domandâ ai furlans dal lôr cjâf.
“Il so cjâf isal speciâl?”, i ai domandât a une siore di Flavuigne. E je dute preocupade a metisi a puest i riçots celestins, che e jere apene stade a fâ la permanente.
“Il to cjâf isal speciâl?’, i ai dit a un omenat che al polsave in bar dopo une zornade passade a messedâ malte. “No utu?”, mi à dit, bevint la ultime.
O tacavi a scunîmi, a no crodi plui in cheste ricercje, ma dut al è cambiât cuant che o soi rivât a Luzignà.
O savês, al è un paisut piçul piçul e par rivâ bisugne vê buine gjambe. O ai lassât la machine pôc prime che al tachi il troi Lacai771 e mi soi metût a cjaminâ.
Tal bosc mi soi rindût cont di vê scarpis propite scartis: o sintivi i riçs di cjastine che mi jentravin tai pîts. O pensavi “cuissà se o rivi a fâ jentrâ chest tra i problemi riscontrati nella ricerca sul campo e a fâmi rimborsâ i cerots”, cuant che ju ai viodûts. Personis, a jerin, ancje se sul imprin o vevi il suspiet che a fossin bestiis. O soi restât. Doi di lôr mi viodin e mi disin: “Mandi, cirial cualchidun?”.
A jerin furlans. Ma a vevin i zenoi come i fenicotars. A pleavin la gjambe par daûr, e tal cjaminâ a vevin une gracie di uciel dute lôr.
“Mandi mandi prof. Fari, di cumò indevant mi ocuparai di cheste ricercje che mi darà plui sodisfazion”, mi soi dit.
E cheste e je la storie.
A Dicembar al ven fûr il gno libri: “I zenoi dai furlans”, o speri che lu comprarês!

Materie: Furlan
di…
#1960