CC26Otubar#25 – Golden hour

#25 – Golden hour

Tal gno inizi e je la mê fin.
O vierç la puarte e chest strani soreli mol e zâl al bute une lûs che e sfrise lis vîts: al somee un cuadri antîc. O inçopedi, jessint de vile, e mi sgrifigni i zenoi: e je une sensazion gnove, e un pôc pai agns, un pôc pai miei muscui no usâts, mi sint disfate. Culinis dolcis, dopo i miei dusinte e trente agns di stelis cence fin: no lis lusutis piçulis, tenaris e coloradis che di ca a tintinin framieç dai boscs, ma i infiers di flamis e di vueit che ogni dì lis nâfss stelârs a sfrisin, in chel abìs scûr, cence fin, assurt, familiâr.
E je la mê prime volte su la Tiere, al è clâr: la mê famee e je di cjase tes coloniis di Titan di sîs gjenerazions incà, ma come ducj i umans e ven di ca, secui indaûr, di cheste tiere antighe che si clame Collio, mi somee. Il viaç al dure vot mês – masse curt pe ibernazion, masse lunc te sô noie – e un cost cence misure. Che par me nol è di sigûr un probleme: ultime ereditiere de dinastie dai Feruljo, cussì siôrs che a son ancjemò parons di regjons intiris su la MariTiere. A son in pôcs, ormai, che a puedin meti pît chi: jessi disusâts al propri planet di origjin al è normâl pai miliarts di animis sospindudis a miliarts di chilometris ator di jê, frede, superbe.
Il soreli al scomence a bussâ l’orizont, la lûs e lis ombris a zuin, si corin daûr.
Tal spazi l’ombre no esist: al è dome scûr, o chê lûs che ti svuarbe e ti cuei. Ma chi dut al somee inocent, no soi usade, o soi parfin malfidente. Lûs di fûc, ombris di glace: o soi partide, clandestine, rustide dai rifletôrs, lassant lis contesis pe sucession, lis barufis cui parincj mieç-aliens, dute la decision su lis coloniis di superfiç: scjampade – mi ‘nt lavi lis mans, che si barufin lôr. Cheste Tiere, par me frede, e je ancjemò mê, mê e je la cjase dal lontan 1800 che e parone chestis culinis obedientis, mê e je, desiderade, bramade, la muart che e metarà fin a lis mês penis. Il gno cuarp nol è fat par resisti a cheste gravitât, i miei polmons a respirin a fadie, e no vuei tutis par respirâ. Ma no rivi a imagjinâ une fin plui dolce, par me, pe mê dinastie, che tornâ, cun umiltât, part di cheste tiere che nus à fats nassi. Il rest dal univiers che al ledi in malore. O bêf une gote di cheste robe che si clame vin. Al è garp, ma familiâr, part dal gno DNA.
Te mê fin al è un gnûf inizi.

Materie: Gjeografie
di …
#1958