ScueleCurte_Tecnologjie11: Alucinazions

La vite e je spes plui sorprendente di ce che o vevin pensât o imagjinât. Cuant che a son rivâts i prins modei linguistics di Inteligjence artificiâl, la robe plui inspietade, dongje de capacitât di rispuindi cun autorevolece su cualsisei cuistion o argoment, e je stade la lôr tindince, di tant in tant, a inventâsi des robis che no esistin. Robis che no son veris, ma che a stan ben tal discors che si stâ fasint. Il non tecnic par clamâ chest fenomen al è Alucinazion e al derive de tecnologjie probabilistiche che e je ae fonde di chescj modei.

I comentadôrs e i gjornâi si son une vore scandalizâts di cheste carateristiche e le àn criticade in lunc e in larc e pûr, a mi, la robe mi è subit someade familiâr.  Se ai di dîle dute, cun chei colegaments estrôs che e rive a fâ la ment umane, cuant che o pensi a lis alucinazions che a fasevin lis primis versions di ChatGpt mi vegnin iniment chês voltis che, sul finî dal mileni passât, o lavi tal Barut di Gjino, intune des stradutis daûr di Vie Mantiche a Udin.

A chei timps, tes fumatelis des gnots d’Invier, nol jere facil cjatâ dai puescj vierts dopo di une cierte ore. Il barut di Gjino tu lu cjatavis simpri viert. Al jere un locâl no tant grant, lunc e stret. Gjino al jere un venezian finît in Friûl par cualchi storie d’amôr. Di dì il bar lu mandave indenant la femine, e jere jê che e faseve par da bon i bêçs cui tramezins pai impleâts e pai universitaris, la sere i tocjave lavorâ a Gjino e la sere i clients a jerin difarents.

Fra i personaçs tipics di chê cumbricule al jere un che, cuant che tu jentravis, tu lu cjatavis fis in bande dal bancon: il Berto. Al jere un om di une etât indefinide, simpri cuntun tai di neri in man. Al stave sentât tal so cjanton, di bessôl, ogni sere li, tant che si podeve pensâ che al fos part de tapeçarie.

Il Berto al jere simpri in vuaite, al spietave che tu fossis sentât e cuietât. Po dopo, a pene che tu tacavis a disi alc a Gjino o a cjacarâ cul ami o la morose che a jerin rivâts cun te, cualsisei l’argoment che tu vevis tirât fûr, Il Berto al intervignive.

Tu cjacaravis de partide dal Udin, il Berto ti contave de doplete di Bettini al Milan tal ’55, se tu ti lamentavis de zulugne de serade il Berto al diseve che nol jere nuie a confront dal Invier dal ’27 cuant che al veve glaçât il mâr di Maran a Grau, se po dopo tu barufavis di politiche o di economie lui ti spiegave che o stavin lant a ramengo dome parcè che i nestris politics no vevin mai let ce che a vevin elaborât i studiôs dal circul di Viene dopo la Prime Vuere Mondiâl.

Se tu contestavis alc il Berto al veve simpri pronte la briscule di zuiâ: no tu savevis cui che al jere Bettini, ti diseve che al stadi Moretti a vevin metût une targhe cui goi che al veve fat, tu riduçavis sintint che la lagune di Maran e jere dute glaçade, e lui ti contave che i pescjadôrs disperâts a vevin tacât a sbusâ la glace tant che i eschimês par cjapâ cualchi pes, se ae fin tu disevis di no vê mai sintût cjacarâ dal circul di Viene lui ti elencave ducj i nons dai membris che a vevin vinçût il premi Nobel pe economie. Nons che, man man che la liste si slungjave, a deventavin simpri plui stramps.

Al va dite che il Berto al jere un ninin invadent, ma le contave ben. I plaseve contâle. Jo o jeri un zovin student a chei timps e a mi disin che al jere facil menâmi pal nâs. Cul passâ dai agns o soi deventât mancul sigûr des robis. Mi domandi ancjemò se Bettini al à par dabon segnât doi goi al Milan tal ’57, no rivi a crodi che e sedi mai stade une lastre di glace lungje di Maran a Grau e no sai nie di ce che al à fat il circul di Viene. E pûr o sint nostalgjie par chês falopis dal Berto e par chel gust di contâlis. Al è par chest che o cjati che i erôrs e lis alucinazions dai LLM di vuê a sedin dome une des musis umanis de tecnologjie.

E voaltris arlêfs di cheste scuele, no varessiso cualchi falope di contâmi? Jo o resti ca sentât inte ostarie e o spieti. Contaitmi almancul une, par plâse.