CC26Otubar#21 – Rally

#21 – Rally

Benvignûts ae trasmission di “Tornìn a Cjase” la corse traviers la perifarie di Buenos Aires. I competidôrs a tachin de jessude de autostrade, e di plui a doprin veturis di 15 agns in medie, cun problemis mecanics di riparâ secont che si rive ae fin dal mês.
Il nestri pilote al va viers sud-ovest, al cjape in buine velocitât la prime strade fin che al rive a la deviazion- provisorie dal 2013- par oparis che e a vevin di concludisi non plui dal 2014, svuincant con braùre i miârs di busis. Sarano passâts par chi i drons di Putin?
Cun dut il nestri competidôr al piert so medie, devant al è un che si viôt che no cognòs e piert timp cirint indicazions e il non de strade. Ingjenui!
Al ricjape la strade principâl e si ferme par une polse di idratazion intun negoziut che da lis 19 e indevant, che al spiete i clients traviers di un barconete di 30 x 30 sbarade cun fiers. Al bêf la Coca, olmant la enorme bandiere nazionâl a ponte de aste di cincuante metris ae fin da la strade. In chel sì che no si an sparagnât bêçs, cjârs scoltadôrs.
Cumò il nestri pilote al cjaparà la part plui impegnative dal circuit, chê cence iluminazion, gjavade fûr par une altre opare provisorie za di siet agns. I prins chilometris al van a bon ritmi fin che e rive ta la zone dai ostacui, cunetis e segnaletiche no piturade.
Viodarìn se il nestri om al à a puest i riflés, i voi, e i as anteriôr de machine…
Ma atenzion! Al frene tal ultin moment – cuasi induvinant – cuant che al jentre ta la strade dal nuie un camion cjariât di cassons di len leâts a la buine, che si drindulin di une bande e di chê altre, ce manovre!
E dibot une altre manovre consecutive par sghindâ une femine che e travierse la strade cjalant il telefonut, intant che a man drete lu passe un motorin in zigzag cence targhe ni casc!
Ce zornade scoltadôrs, ce zornade!
E velu chi a cjase une ore e mieze daspò de partence, il campion san e salf par une altre dì, e la femine tant che reporter nus invie il so testemoni in esclusive:
“Parìs- Dakar? No stâ fâmi ridi…”

Materie: Gjinastiche
di …
#1954