CC26Otubar#10 – La seste femine

#10 – La seste femine

A jerin fûr di cjase. A 4 oris di viaç di Udin. A vevin di zuiâ cuintri di une scuadre plui in jù da lôr te classifiche, ma stant che la lôr scuadre no veve  un sponsor cuissà ce grant, a viazavin su di une coriere scancarade e cussì dispès a rivavin a destinazion za avonde strachis, prime ancjemò di scomençâ la gare.

A jê i plaseve zuiâ a bale tal zei, ma… no denant di un public, ni tai campionâts.
A restavin i alenaments, chei gaiarins, lontans dal grant derby, e lis partidis cui mascjos intal cjamput daûr de glesie. No sintive lis vogladis di chei altris, ni la lôr spiete.  E dismeteve di pensâ, di criticâsi, il sô cuarp al saveve ce che al veve di fâ.

Come simpri e jere sentade su la bande de bancjute plui distant dal mister, e e incitave sotvôs la pivot de cuâl jê e jere la risierve. Clare: le clamavin l’Airon! Il mût che e veve di svicinâsi al zei e il tierç timp che e faseve no davin scjampe a lis difensoris. Moviments determinâts, naturâls, che a cjatavin la vie pe rêt. E jere une maravee cjalâle. Ma vuê no jere la sô zornade. In pôc timp e jere rivade al tierç fal. L’alenadôr al cjaminave in maniere stiçade insù e injù denant de bancjute e le cjalave, il sest om.

“Ti prei, Clare, vonde monadis” al pensave dentri di sé. Nancje dit ve che e barufe sot dal zei,arbitri al fermà il zûc e cul braç dret al segne Clara une altre volte. “Noooooooo! Il cuart fal!”
Di buride l’alenadôr al le dongje di jê, i tocjà la spale e i disè: “Sù po, tache a a scjaldâti”. La panze e scomençà a ingrispâsi e il flât a scurtâsi. Corint viers de posizion di cjapâ il sô cjaf e il sô cuarp a vevin inmaneât dôs stradis diferentis. Pôc dopo, tornât a tacâ il zûc, i rivà un comedon calcolât parbon sul flanc. Daspò sot dal zei dôs aversariis i molarin altris doi sburtons di scuindon par taiâle fûr. Se al jere alc che no tolerave al jere cui che al zuiave mâl. E alore, planc planc si sintive di deventâ verde. La rabie a jere fûr di misure, imense, bocognone: cumò al esisteve dome il cjamp e cui che al jere dentri. Il rest al jere lât fûr di fûc e smamît. E cussì e scomençà une des sôs miôrs partidis : e acelerà il pas, e slargjà il varc, e difindè, e saltà, e ripià lis balis vagolants, e e segnà une sglavinade di ponts.

Materie: Gjinastiche
di…
#1943