CC26Otubar#09 – Il paradîs

#09 – Il paradîs

Ane e je logopediste: e à simpri pensât che “logopediste” e sedi une peraule brute, strambe, ma il so lavôr invezit al è tant biel. E jude personis speciâls, par che a imparin a fevelâ o a scrivi, o par che a tornin a imparâ.
Ane e à ancje tantis passions fûr dal lavôr: la mont, la musiche, la leterature…
La mont e je il so paradîs: che al sedi cjaminâ, schiâ, soredut rimpinâsi, tal cret, te glace, Istât e Invier, simpri. Il paradîs.
Ma cui che al crôt tal paradîs al pues scugnî imparâ che al è ancje l’infier: e cussì al sucêt vuê, ta chê parêt inglaçade. Alc nol ten, Ane e cole. Cetant e ce svelte che e cole, e cetant a planchin: dut si ferme par cualchi secont o par simpri cuant che si cole cussì. Ane e sint la glace dure che sfrisse il casc, dilunc jù par desenis di metris, come une muele che e uce une lame. Po e sint un cloc.
Cuntune colade cussì si mûr, par fuarce.
Ma invezit i socors le cjatin vive.
Cuntune colade cussì si mûr: almancul alc.
Al è muart cualchi tocut di cerviel: Ane tal discori e dîs peraulatis, blestemis, no par rabie, ma parcè che un toc di cerviel si è studât; Ane no sa plui lis letaris, no sa lis notis, un altri toc di cerviel distudât.
Ma un pôc par volte i flums dal so cjâf a cjatin gnûfs agârs: a passin mês e lis peraulatis a vegnin fûr dome par cui che ses merete, lis letaris a tornin a contâ storiis maraveosis, lis notis a mostrin i suns.
Ma Ane no je plui logopediste: e je fuarte, tant fuarte di tornâ in mont a cjatâ il so paradîs, ma no rive a tornâ a cjalâ ogni dì tal spieli di chei altris i tocs dal so cerviel che a son muarts.

Materie: Furlan
di…
#1941