E torne a fevelâ la Vôs de Basse

E in sumis… ve ca une gnove che a noaltris di Contecurte no pues fâ altri che plasê.

Eh, sì, di simpri o smicjin di vê un concors par contis curtis e il concors plui dongje ai nestris desideris, par cumò, al è propite Vôs de Basse. Par la sezion che nus interesse di plui, si trate di scrivi una conte curte di argoment libar cun mancul di 3000 batudis… in pratiche ce che o stin fasint une volte al mês te nestre ScueleCurte.

E alore, chest invît al è soredut pai nestris contecurtârs, e no par vinci alc, i mancjarès. Mandâ une conte, biele o brute che e sedi, al è ancje un at politic e sociâl. Parcè che al è facil lamentâsi che al furlan no i dan chel, no i dan chest, lu sotanin di ca, lu sotanin di là, e lis risorsi a vegnis straçadis in fufignis e monadis… cuant che però a metin adun un concors seri dulà che une elevade partecipazion e sarès une buine maniere di alcâ la vôs (no dome chê de basse) su chescj temis, ve che no cjatin il timp.

Us lassin chi sot un estrat dal bant di concors che us sclarìs in struc la robe:

Al è saltât fûr il bant de novesime edizion dal concors leterari in lenghe furlane “Vôs de Basse”, inmaneât dai Comuns di Cjarlins, Gonârs, Muçane, Porpêt, Prissinins e San Zorç di Noiâr, midiant dal Sportel associât pe lenghe furlane e cul patrocini de Societât Filologjiche Furlane e de Cooperative Informazione Friulana / Radio Onde Furlane. La iniziative, che si partecipe sore nuie e che e je pensade par stiçâ la int a scrivi par furlan, e vûl ancje jessi un omaç a cualchidune des figuris che a àn insiorât il panorame culturâl de Basse furlane, tant che pre Zaneto, Tita Marzuttini, Gina Marpillero, Luciano Morandini, Alviero Negro e Pierluigi Visintin. Par cirî di dâur vôs a dutis lis diviersis espressions, il bant al previôt cuatri diviersis sezions: narative (contis curtis e tescj teatrâi), poesie, traduzion e students de scuele primarie e secondarie di prin grât.

E par chei che ur covente che fracant achì si scjame il Bant Vôs de Basse 2026