CC26Novembar#04 – Lant in tal for

#04 – Lant in tal for

And è di chei che a àn una dople vite. Jo soi un di chei. Par vie dal mistîr che o fâs, a mi covente propit. Devant de parintât o scugni meti sù une muse lungje; la mê tabaiade e à di jessi calme; no pues ridi, cjantâ e nancje tabaiâ a stupit vie. Ogni dì jo o met sù i vistîts scûrs, soredut la dì de funzion.
Ma al è il toc di strade par lâ a brusâiu che a mi cambie di sest. Lant i sin simpri no doi bessôi e a mi ven de anime di impiâ la radio. La prime cjançon che i cjati, che o sai encje jo e che par gno cont a sta ben cun chel che i puarti, le met alte e le cjanti di gust. Chi a ven fûr la mê passion. A mi sarès plasut cjantâ dut trucât e cun la lengate di fûr come i Kiss. O cori sù e jù sberlant come Axl. In tal cjar duncje jo o cjanti e mi smeni a timp. Cetant ben che stoi in chel moment.
Ai 6 di Novembar dal ’24 stavi lant tal for di Glemone e la siore distirade daûr sai che e lave mate par Alan Sorrenti. Par câs su Radio Birikina no ano mandât “Tu sei l’unica donna per me”. E alore, vie a cjantâle!  Le savevi a memorie parcè che i miei a mi àn tirât sù a pan e aradio e i miei a son coscrits  de siore che i vevi daûr. Di frut duncje si sintive simpri la aradio e simpri chês cjançons… Alan Sorrenti, Julio Iglesias, Pupo, Mina, Milva… se no tu sintivis la radio no tu scoltavis musiche.
Par rivâ a Glemone la strade e je lungje e jo o ai zirât su Radio Onde Furlane. Li a vevin mitût su “Vegle di Lune Nere” dai FLK. Sigûr la fie de siore le sintive par radio, in cusine intant che a lavavin i plats o che a fasevin la gugje.
Su Radio Sorrriso pôc dopo o vin sintût “Tous les garcons e le filles…” che mi pâr e fos cjantade da la “Cantante Scalza”. L’om de siore, migrant in France, sigûr le cjantave pensant a la sô femine, a la cjase di fâ sù…
Cussì par ognidun che i puarti a cremâ, ator par il Friûl. Cjanti content lant daûr a la aradio. E mi pâr di fâi plasê a compagnâiu in cheste maniere fin tal for.
Cuant che i torni indaûr, repliche! Dome che par radio i sielç lis cjançons dai grups… Queen, Nomadi, Beatles, Equipe 84, Cranberries… ciò! Chei che a vegnin cremâts a puartin vie poc puest e, in te machine aziendâl, pues puartâ jù cuatri o cinc e podìn cjantâ lis cjançons li che ognun al cjante la sô part.

Materie: Musiche
di …
#1967