CC26Otubar#05 – La corse des bighis

#05 – La gare des bighis

Cumò no lu crodarès nissun, ma in chê volte al sucedeve propit cussì. Su la catidre la professoresse a tignive un cinisâr e e impiave un spagnolet mentolât daûr di chel altri. Lis interogazions a si fasevin propite li, trê a drete e trê a çampe dal scagn. Classe dome di masclis, nancje a dîlu. E funzionave che la professore e faseve la domande e se tu la savevis tu alçavis la man. Po jê e faseve dâ la rispueste a un arlêf a câs. Se le saveve al cjapave un “plui” e cussì ducj chei che a vevin alçat il braç, ma se a no le saveve in bande di vuadagnâ un “mancul” si passave a un altri, che se al veve blufât al cuistave doi negatîfs.
In sumis: o tu vevis studiât par ben o il risultât si basave ancje sui gnerfs salts, molant o fasint fente di jessi sigûrs par meti dongje cualchi “plui” cence merit, a pro dal vôt finâl. Talian, latin, storie o gjeografie, ma ancje une strategjie di improvisazion.
Dut câs lis interogazions a no jerin il piês torment, parcè che lis peraulis che a mi sveavin di bot vie pe gnot, ancje daspò agns e agns, a jerin “libret personâl”. Alì la fertaie e jere fate, une biele note di puartâ a cjase e tornâle dongje sotscrite di un gjenitôr. Cualchidun al rivave a contrafâ la firme. Jo o ai provât une volte sole e mi an becât a colp. Nol coventave fâ cuissà ce, bastave smenteâ i sfueis di protocol o no vê mandât a memorie une poesie e la manarie e colave sul libret personâl.
A rivuart dal compuartament nancje fevelâ. Ancje alçâsi di buride al sunâ de campanele o meti vie i libris prime da fin de ore a clamavin dongje une note severe. La volte che o ai riscjât di plui, però, e je stade par colpe dai Romans. Displeant la storie di Rome antighe no saltie fûr che il sport plui popolâr al fos la corse di cjars tirâts dai cjavai e dal moment che il cjar al jere tirât di doi cjavai si clamave corse des bighis… Visualizant ben altris bighis no soi rivât a tratignîmi e o soi stât cjastiât, ma in chê volte gno pari si è fate une biele ridade intant che al firmave la note.

Materie: Gjinastiche
di…
#1938