Fantastics Furlans e dulà cjatâju!

Vele ca parsore la gnove!

Cemût po che no savês nuie? Anìn par ordin! Si visaiso cuant che l’an passât sin lâts ae Fieste de Patrie dal Friûl inte suaze dai Colonos a rindisi simpatics a chei che ancjemò no nus cognossevin?

Ben po, ce che no savês al è che tal post fieste o sin lâts a bevi biris cuntun pâr dai fantacins che a àn pensât ben di inventâsi la Adunade dai Furlans, a Rivignan-Teôr. E fin ca nuie di gnûf. Anzit, Maximilian Glîr lu vin parfin tirât dentri in Ostarie a fâ di Archeolic! Ma chel, cuissà, forsit par svindic, forsit par spirt di aventure, al à pensât ben di clamânus a fâ un spetacul dai nestris inte suaze de manifestazion, che chest an no mole e e à metût impins la seconde edizion,  che e va da lis conferencis al concert dai FLK.

Une zornade di fieste e di furlanitât che si davuelzarà sabide ai 5 di Avrîl, cuntune schirie di apontaments che invezit di contâus us ai fasìn lei ducj! Ve ca la locandine cun ducj i events.

Come che o vês viodût, dentri des robis, jenfri la Costituzion e la Cene, o sin ancje noaltris di Contecurte, che se o vin ben capît, o vin di sei ridûts de int… Nuie di plui facil!

Us spietìn ducj a Teôr, sul cjamp di balon o li dongje, par gjoldisi une biele zornade, sperìn di soreli, e par bevi alc insiemi. E cun di plui o podês ancje vignî a comprâ i libris di Contecurte, sedi il prin, sedi chest ultin, sedi chel dal Ostîr cu la coghe. E za che o sês, se us covente, o cjatais ancje i libris dal Ostîr, comprendûts chei par talian.

Cemût disêso? Ce spetacul che o fasìn? Eh… par cumò l’Ostîr al è daûr a limâ i ultins detais (al à inmò di finî di scrivi plui di mieze vore!) ma al sa che il titul e il spetacul a varan pardabon a cefâ cun Fantastics Furlans… no podês pierdisal!