CC24_La classifiche di Setembar

E velu ca, il moment che ducj i mus a spietin e no dome lôr: la classifiche dal mês e cun dongje la classifiche de stagjon estive e chê dal FCC.

La gnove e je che al è stât un mês une vore particolâr, cuntun teme dât dal Ostîr che al è plasût a tancj, stant che al à fat cognossi une vore di cjançons furlanis e di scrivi parsore ancje la conte. Robe che però no je par nuie facile, e in efiets o vin vût contis di gjenar une vore diferent e tancj autôrs a àn decidût di jessi fûr de lôr “comfort zone”, comprendûts i prins de classifiche. L’esit al è stât un dislidisi des votazions dal public, che a àn scometût su tantis contis, e ancje un sparniçâsi des preferencis de zurie, che e à preseât contis une vore diferentis tra di lôr.

Une conte però e pâr vê metût adun public e zurie, e cence fâus spietâ masse, ve ca, la classifiche dal mês di Setembar, cuntun vincidôr che al è saltât fûr des retroviis in maniere dal dut inspietade!

O fevelin propit di lui, Vercingetorix, mus di divignince galiche che al à sdrumât ducj i mus plui innomenâts e blasonâts cuntune conte di orôr une vore ben jessude, e che soredut si pee in maniere perfete ae cjante “O spachi dut” dai Pantan. Vait a leile e vait a sintî il toc, linkât tal titul. 140 ponts par lui, cun doi de zurie che lu àn metût al prin puest e ancje i 7 ponts dal FCC.

Daûr o vin i mus plui in forme, che a son ancje i doi vincidôrs des ultimis stagjons. No savìn se la lôr rincorse e rivarà a cjapâ i prins doi, ma cun ancjemò trê tapis a lôr disposizion a scugnin pardabon provâ a jentrâ dentri te corse par vinci la Corsecurte. O fevelìn di Torototele e Teresine la çuete, a pari ponts al numar 2 dal mês di Setembar, che a rosein ancjemò cualchi pontun a Brene Sfolmenade e a Catine la nere. Chescj doi mûs, infati, a àn sielzût di cambiâ alc intes lôr contis ma aromai o vin capît che a son mus di raze e a son rivâts 5t e 6st, sorpassâts di une grande prove di Stele Alpine, che ogni tant e à dai salustris no di pôc. Di marcâ ancje lis cjançons che a àn compagnât chescj mus inte lôr conte, parcè che e je dute musiche gnove: Silverio par Teresine, Rive no tocje par Torototele, Brût & Madone par Catine, Urtie par Stele Alpine e, unic classic dal trop, i FLK par Brene Sfolmenade. Vait a lei lis cjantis e scoltâ lis contis… no, il contrari.

Al va marcât ancje che subit daûr chescj ca, i miôr a son stâts dai outsider, come Bultrik, Daisy, Siruc e No Ancjemò, che a àn mostrât di no volê molâ…. Da rest, un puest tai 10 al è simpri un gran biel risultât, cun chest nivel di storiis. Di chê altre bande, o vin mus come Ippogrifo, Daûr la Lavagne, Incocalît, Muspilli e Derna che a parin vê un tic di sflacje e a son ancje chest mês sot des lôr performance solitis. Al torne a cori, invezit, Nonio.

Cun di plui, chest mês e je stade une classifiche une vore curte inte part centrâl: in vincj ponts o vin cuasi vincj mus e al sarès bastât un voto diferent di un sôl zurât par cambiâ une vore lis posizions.

O sierìn cuntun brâf a Chel di Cormons, che nol abade plui a lis penalitâts e cuntune conte di passe 4000 caratars (e vincj ponts di pene) al è rivât adore a tornâ in positîf. Un ultin puest bausâr, il so.

Ma anìn daurman a viodi ce che e à puartât la classifiche di Setembar… Vele ca!

Come za dite, i prins doi puescj a son restâts chei e a son in pratiche a pari merit e fin cumò a àn otignût tor l’87% dai ponts disponibîi. In pratiche Catine la Nere e Brene Sfolmenade no van mai plui in jù dal 5 o 6 puest. Ma… rivarano a tignî bot fin tal ultin? Torototele e Teresine la çuete, subit daûr, a scomencin pardabon a jessi dongje a une distance che no je curte, ma no je nancje impussibile di jemplâ, soredut cjalant lis lôr performance plui resintis, simpri sul podi o cuasi. Tant al è che Torototele al à vinçût il titul di Campion di Istât, cun 80 ponts (e simpri cun contis sot dai 1500 caratars, ancje se si pues lâ fin a 2000 cence penalitât) e Teresine e à sorpassât Glorious Grene e aromai e je rivade cuasi sul podi. A àn aromai bandonât i siums di vitorie, invezit, propite Glorious Grene e Muspilli, cuntun altri mês dulà che a àn tirât flât e che ancje se no ur fâs pierdi posizions ju met une vore dongje a Nonio e Atile, che a tachin za a viodi un puestut in Champions, tai prins cinc.

E daûr? Al è dut un messedâsi: Matungo e Incocalît a van jù, lassant puest a Stele Alpine e Daûr la Lavagne. Vercingetorix e Bultrik a sorpassin Derna e Ippogrifo. E intant, cun Ghiringhel che al zuie il bonus No Cumbini! a son restâts in 21 a vê scrit ogni mês, par 9 voltis di file. Brâfs!

Sierìn cul FantaCorseCurte, dulà che al è un altri cambi al vertiç: Muspilli al è lât mâl tal scrivi ma al à imbrucjât la conte vincidore, e cussì la gjatemarangule e à pierdût la vete, restant a 9 ponts di distac. Ma si sa, ca al baste scometi sul mus falât e si pues pierdi come nuie 10-15 ponts. Ve ca la classifiche, dulà che e va indevant ancje la risalide di Ricart e Jacum, e la tierce posizion tignude cui dincj di Derna.

E ancje par chest mês, la Corsecurte e je stade un sucès, e cumò o spietìn di viodi ce che al sucedarà chest mês di Otubar cui cuadris di autôrs furlans!

Stay colegâts e in spiete de RadioCorseCurte24 di setemane che e ven!